रुकुम पश्चिम -२९, असार ।
रुकुम पश्चिमको सानीभेरी गाउँपालिकाले शनिबार पत्रकार दिपेन्द्र महतारालाई सम्मान गरेको छ । पालिकाको १७औँ गाउँ सभाको बैठकले पत्रकार महतारालाई सम्मान गरेको हो ।
गाउँपालिकाले महतारा सहित ३० जनालाई पनि सम्मान सहित पुरस्कृत गरेको छ । नेपाल पत्रकार महासंघ रुकुम पश्चिम भागका सचिव समेत रहेका पत्रकार महतारा रेडियो सानीभेरीमा कार्यक्रम उत्पादकको रुपमा कार्यरत छन् ।
गाउँपालिकाको समग्र क्षेत्रको सूचना प्रकाशन, प्रशारण तथा पत्रकारितामा पुऱ्याएको योगदान बापत उनलाई सम्मान गरिएको छ ।
चालु वर्ष ८१/८२ को कार्यसम्पादन मुल्याङ्कनका आधारमा विभिन्न पेशामा आवद्ध ३० जना व्यक्तिलाई सम्मान पत्र, दोसल्ला र नगद पुरस्कारले सम्मान गरिएको सानीभेरी गाउँपालिकाका प्रमुख प्रशासकीय अधिकृत दिपक बुढाथोकीले जानकारी दिए ।
उनका अनुसार गाउँपालिकाले उत्कृष्ट विद्यार्थी, शिक्षक, किसान, कर्माचारी, विद्यालय व्यवस्थापन समिति, सामाजसेवी, महिला, पत्रकार र कार्यालय सहयोगीलाई सम्मान सहित पुरस्कृत गरेको बताइएको छ ।
यसैगरी बैठकबाट सानीभेरी गाउँपालिकाकाे आर्थिक बर्ष ८२/८३ काे विनियोजन विधेयक, आर्थिक विधेयक, न्यायिक समिति, बार्षिक प्रतिवेदन, सभा समिति गठन र लेखा समितिकाे प्रतिवेदन पारित गरेको छ ।
त्यस्तै चालु वर्ष ८१/८२ मा कार्यपालिकाले गरेका सबै निर्यणहरू सभामा पेश गरी सर्वसम्मत रूपमा पारित गरिएको छ ।
