रुकुम पश्चिम -२१, असार ।

रुकुम पश्चिमको चौरजहारीमा असार १७ गते भएको देविका हत्याको विषयलाई लिएर नेपाल पत्रकार महासंघ र क्रियाशील संघ-संगठनले कडा शब्दमा निन्दा गरेका छन् । महासंघ र जिल्लाका चारवटा पत्रकार संघ-संगठनले आज एक सामूहिक प्रेस विज्ञप्ति मार्फत जघन्य हत्याको निन्दा गरेका हुन् ।

महिला माथि हुने हिंसात्मक घटनालाई सामाजिक, कानुनी र नैतिक हिसाबले पूर्ण अस्वीकार गर्दै महासंघ र संघ-संगठनले न्यायिक प्रक्रिया मार्फत दोषीलाई आजीवन काराबासको सजाय दिलाउन माग गरेका छन् । पीडित परिवारलाई शीघ्र न्यायका लागि सरकारसंग जोडदार अपिल गर्दै उक्त घटनाप्रति महासंघ र संघ-संगठनले परिवारप्रति समवेदना व्यक्त गरेका छन् ।

यसैगरी पत्रकारिताको धर्मअनुसार अपराधजन्य घटनाको सूचनामूलक र तथ्यमा आधारित भएर समाचार सम्प्रेषणमा सञ्चार माध्यमलाई गम्भीर हुन आग्रह गरिएको छ । देविका हत्याको घटनालाई लिएर केही सामाजिक सञ्जाल र सञ्चार माध्यमले पीडित परिवारको गोपनियता भावनात्मक अवस्था र सम्मानलाई ख्याल नगरिएको पाइएको छ । यस्तो संवेदनशील अवस्थामा पीडितको तस्बिर र व्यक्तिगत विवरण ख्याल नगरी प्रकाशन तथा प्रसारण नगर्न विज्ञप्ति मार्फत अनुरोध गरिएको छ ।

त्यस्तै पत्रकार महासंघ र संघ संगठनले यस्ता संवेदनशील घटनाको समाचार सम्प्रेषण मर्यादित र तथ्यपरक भएर मात्र गर्न आग्रह गरेको छ । साथै देविका घटनाका सन्दर्भमा अमानवीय गतिविधि गर्ने र पत्रकार आचारसंहिता विपरीत कार्य गर्नेलाई
प्रेस काउन्सिल नेपालले अनुगमन र कारबाही गर्नुपर्ने विज्ञप्तिमा भनिएको छ ।

चौरजहारी नगरपालिकाकी ३० वर्षीया देवीका बुढाथोकीलाई उनकै श्रीमान चन्द्रबहादुर बुढाथोकीले खुकुरी प्रहार गरेर हत्या गरेका थिए । सोही जघन्य घटनालाई लिएर जिल्ला स्थित पत्रकार महासंघ र क्रियाशील चार संघ संगठनले सो घटनाको विरोध गर्दै सामूहिक विज्ञप्ति निकालेका हुन् ।