रुकुम पश्चिम -१६, असार ।
रुकुम पश्चिमको संस्थागत विद्यालय विजयश्वरी बोर्डिङ स्कुलले यस वर्षदेखि एसइईमा ए प्लस प्राप्त गर्ने नौ जना विद्यार्थीलाई जेहेन्दार छात्रवृत्ति प्रदान गर्ने भएको छ । रुकुम पश्चिमको ६ वटा पालिका र रुकुम पूर्वको तीनवटा गरी नौ वटा पालिकाका एक/एकजना विद्यार्थीलाई जेहेन्दार छात्रवृत्ति प्रदान गर्ने भएको हो ।
विजयश्वरी बोर्डिङका प्रिन्सिपल जयबहादुर थापाका अनुसार ३.६० भन्दा माथि जिपिए ल्याउने एकएक जनालाई पालिकाको सिफारिसमा छात्रवृत्ति प्रदान गरिनेछ । छात्रवृत्ति प्राप्त गर्ने विद्यार्थीले कक्षा ११ र १२ मा निःशुल्क रुपमा अध्ययन गर्न पाउनेछन् । यस स्कुलले ती विद्यार्थीबाट कुनै पनि शुल्क नलिने गरी निर्णय गरिएको प्रिन्सिपल थापाले बताए ।
जेहेन्दार छात्रवृत्ति घोषणा गरी नौ जना विद्यार्थीलाई निःशुल्क रुपमा पढ्ने वातावरण तय गरेकाले सो विद्यालय कर्णालीकै पहिलो संस्थागत विद्यालय भएको यस स्कुलले दाबी गरेको छ ।
बोर्डिङ स्कुलको यो निर्णयले रुकुम पश्चिम र रुकुम पूर्व जिल्लाका नौ वटा पालिकाका नौ जना जेहेन्दार विद्यार्थीलाई निःशुल्क अध्ययनमा सहज हुने भएको छ ।
अतिरिक्त क्रियाकलापमा विजेता हुनेलाई छुटको व्यवस्था
यसैगरी यहाँको बोर्डिङ स्कुलले अतिरिक्त क्रियाकलापमा विजेता हुने विद्यार्थीलाई छुटको व्यवस्था गरेको छ । पालिका देखि राष्ट्रिय स्तरका अतिरिक्त क्रियाकलापमा विजेता हुने विद्यार्थीलाई गत वर्षदेखि छुटको व्यवस्था गरेको छ ।
प्रिन्सिपल थापाले अतिरिक्त क्रियाकलापका विभिन्न विधा अन्तर्गत स्वर्ण पदक विजेतालाई पूर्ण रूपमा अध्ययन गर्न पाउने छुटको व्यवस्था गरिएको बताए ।
त्यसैगरी रजत पदक विजेतालाई ५० प्रतिशत छुट र कास्यपदक विजेतालाई २५ प्रतिशत छुट गरिएको छ । सो छुट मासिक शुल्कका रुपमा लागू हुने गरी व्यवस्था गरिएको बोर्डिङ स्कुलले बताएको छ ।
