रुकुम पश्चिम -११, असार ।
दृष्टि न्यूज अनलाइनमा प्रकाशित समाचारका कारण विशेष अदालतले पत्रकारलाई अदालतमा उपस्थित हुन आदेश दिएकोप्रति समाजवादी प्रेस संगठन, नेपालले कडा आपत्ति जनाएको छ । संगठनले उक्त आदेशलाई प्रेस स्वतन्त्रता माथिको नियोजित आक्रमणको रूपमा व्याख्या गर्दै एक प्रेस विज्ञप्ति मार्फत् आपत्ति जनाएको हो ।
‘विशेष अदालतमा विचौलियाको चलखेल हटेन, सेटिङका मुद्दामा ३ महिनामै सफाइ’ शीर्षक समाचारप्रति असन्तुष्टि जनाउँदै विशेष अदालतले दृष्टि अनलाइनका अध्यक्ष शम्भुलाल श्रेष्ठ, सम्पादक एमपी सुब्बा तथा सम्बद्ध पत्रकारलाई अदालतमा बोलाएको थियो ।
मंगलबार जारी गरिएको विज्ञप्तिमा संगठनका महासचिव रोहित दाहालले भनेका छन्, “विचौलिया, भ्रष्टाचार र न्यायपालिकाभित्र देखिएको अपारदर्शी व्यवहारमाथि प्रश्न उठाउनु पत्रकारको कर्तव्य हो । तर, समाचार लेखेकै आधारमा अदालतमा तानिनु, सामग्री हटाउन बाध्य पारिनु र पत्रकारको कलम बन्द गर्ने प्रयास हुनु अभिव्यक्ति स्वतन्त्रताको कुठाराघात हो।”
विज्ञप्तामा यसअघि सर्वोच्च अदालतले नेपालखबर र बिजमाण्डुमा प्रकाशित सामग्री हटाउने आदेश फिर्ता लिएको प्रसङ्ग जोडिँदै, विशेष अदालतको विपरीत निर्णयले लोकतान्त्रिक मूल्य र स्वतन्त्र प्रेसप्रतिको दृष्टिकोणमा प्रश्न उठाएको छ ।
सो संगठनले विज्ञप्ति मार्फत् चारवटा माग मार्फत वरिष्ठ पत्रकार शम्भुलाल श्रेष्ठ, सम्पादक एमपी सुब्बा तथा संवाददातामाथिको अदालत उपस्थितिको आदेश तत्काल फिर्ता गर्नुपर्ने, समाचार सम्पादन तथा प्रकाशनको विषयमा अदालतले हस्तक्षेप गर्ने प्रवृत्ति बन्द गर्न माग राखेको छ ।
त्यस्तै संवैधानिक निकायहरूले प्रेस र अभिव्यक्ति स्वतन्त्रताको संरक्षणका लागि स्वतन्त्र भूमिका निर्वाह गर्न तथा सञ्चारमाध्यमहरूलाई डर, धम्की र अदालती दबाबबाट मुक्त गरियोस् भन्ने माग विज्ञप्तिमा राखिएको छ ।
