रुकुम पश्चिम -१३, जेठ ।

नेपाल कम्युनिस्ट पार्टी एकीकृत समाजवादी कर्णाली प्रदेश कमिटीले आज माननीय मुख्यमन्त्री यामलाल कँडेललाई स्मरण पत्र बुझाएको छ । पार्टीले वैशाख १९ गते बुझाएको माग पत्रको कार्यान्वयन सम्बन्धमा स्मरण पत्र बुझाएको हो ।

प्रदेश अध्यक्ष ठगेन्द्र प्रकाश पुरीका अनुसार पार्टी सचिव तथा प्रदेश इन्चार्ज चन्द्र बहादुर शाही सहितको प्रतिनिधि मण्डलले स्मरण पत्र बुझाएको छ ।

यसअघि प्रदेश पार्टीले सुशासन र रोजगारी समाजवादको तयारी भन्ने मुल नारा सहित पार्टी केन्द्रले सुरु गरेको पहिलो चरणको आन्दोलन अनुरूप मुख्यमन्त्रीलाई मागपत्र बुझाएको थियो । सोही मागपत्रमा उल्लेख गरिएको ५१ बुँदे मागलाई सम्बोधन हुने गरी कार्यान्वयन गर्न पुनः स्मरण पत्र बुझाइएको प्रदेश कमिटीले बताएको छ ।

मुख्यमन्त्रीले स्मरण पत्र बुझ्दै नेकपा एस प्रदेश कमिटीले बुझाएको मागपत्रमा उठाइएका विषयवस्तु असाध्यै राम्रो भएको बताएका छन् । प्रदेश सरकारको स्रोत साधनले धान्न सक्ने गरी पार्टीले उठान गरेका मागहरुको सम्बोधन गरिने विश्वास समेत दिलाएका छन् ।

नेकपा एस कर्णाली प्रदेश कमिटीले कर्णाली प्रदेशको जनताको गरिबी अन्त्यका लागि जल, जमिन, जङ्गल तथा सुशासन सहितको रोजगारी व्यवस्थाका लागि मागपत्र बुझाएको छ ।