रुकुम पश्चिम -१३, जेठ ।

२३औँ कृष्ण सेन ‘इच्छुक’ स्मृति दिवसको अवसरमा प्रेस सेन्टर नेपाल रुकुम पश्चिमले जिल्ला कारागार रुकुम पश्चिमका कैदीबन्दी र सुरक्षाकर्मीहरूलाई फलफूल वितरण गरेको छ । पत्रकारिता र परिवर्तनका लागि जीवन समर्पण गरेका इच्छुकको स्मृतिमा आयोजित कार्यक्रममा १ सय ६३ जना कैदीबन्दी, कारागार प्रशासन, सुरक्षाकर्मी लगायत करिब २०० जनालाई फलफूल वितरण गरेको हो ।

प्रेस सेन्टरका जिल्ला अध्यक्ष मनिष खड्काले समाजमा आशा, सहयोग र सहानुभूतिको भावना फैलाउने उद्देश्यले फलफूल वितरण कार्यक्रम आयोजना गरिएको बताए । साथै आज दिउँसो २ बजे इच्छुकको सम्झनामा रचना वाचन कार्यक्रम र आज साँझ दीप प्रज्वलन कार्यक्रमको आयोजना गरिने खड्काले जनाए ।

पत्रकार तथा कवि कृष्ण सेन इच्छुक पिता यामबहादुर सेन र माता भीमकुमारी सेनको कोखबाट वि.सं. २०१३ कात्तिक ३ गते भारतको देहरादुनमा जन्मेका थिए । उनलाई काठमाडौँको भृकुटीमण्डपस्थित महेन्द्र पुलिस क्लबको हिरासतमा अमानवीय ढङ्गले निर्मम यातना दिएर २०५९ जेठ १३ गते हत्या गरिएको थियो ।

कार्यक्रममा प्रमुख जिल्ला अधिकारी कुल जीसी, नेकपा (माओवादी केन्द्र) का केन्द्रीय सदस्य तथा जिल्ला इन्चार्ज कुशल शर्मा, जिल्ला संयोजक सचिन रोका, जिल्ला प्रहरी प्रमुख डिएसपी प्रमेश विष्ट, नेपाल पत्रकार महासंघ रुकुम पश्चिमका सचिव दीपेन्द्र महतारा, प्रेस युनियनका केन्द्रीय सदस्य प्रबिर ददेल, प्रेस युनियन जिल्ला अध्यक्ष सुमित्रा गौतम, प्रेस चौतारीका जिल्ला अध्यक्ष परिचन्द्र खत्री, समाजवादी प्रेस संगठनका जिल्ला अध्यक्ष भरत चन्द लगायतको उपस्थिति रहेको थियो ।