रुकुम पश्चिम -१२, जेठ ।

मुसिकोट नगरपालिका वडानम्बर -१२, ले आज जेष्ठ नागरिकलाई अम्खोरा र खादाले सम्मान गरेको छ । तेस्रो वर्षको कार्य प्रगति विवरण सार्वजनिक तथा समीक्षा कार्यक्रममा वडाका जेष्ठ नागरिकलाई अम्खोरा र खादाले सम्मान गरेको हो ।

वडाध्यक्ष धिरण सिर्पालीले ६८ वर्ष माथिका ९० जना जेष्ठ नागरिकलाई सम्मान गरिएको बताए । मायाको चिनो र सम्मान स्वरूप जेष्ठ नागरिकलाई पानी खाने अम्खोरा र खादा लगाएर सम्मान गरिएको अध्यक्ष सिर्पालीको भनाइ छ ।

वडाले प्रत्येक वर्ष जेष्ठ नागरिकलाई सम्मान गर्ने कार्यक्रम अनुसार यस वर्ष पनि वडाका सबै जेष्ठ नागरिकलाई वडा कार्यालयमै बोलाएर सम्मान गरिएको छ । वडा कार्यालयले गरेको सम्मानबाट जेष्ठ नागरिकहरू खुसी भएका छन् । उक्त कार्य आफूहरूका लागि सम्झन लायक भएको सेतुराम ओलीले बताए ।

यसैगरी वडा कार्यालयले वडाका स्वास्थ्य स्वयंसेविकालाई पनि सम्मान गरेको छ । चारजना महिला स्वास्थ्य स्वयंसेविकालाई छाता र झोलाले सम्मान गरिएको छ । त्यस्तै वडा कार्यालयको विकास निर्माण तथा समग्र गतिविधिलाई समाचारको रूपमा सम्प्रेषण गर्ने तीनजना पत्रकारलाई पनि सम्मान गरेको छ । पत्रकार मेगराज खड्का, अमरराज पुन र दिपेन्द्र महतारालाई सम्मान गरिएको छ ।

वडाको विकास र समृद्धिलाई उजागर गर्ने गरी चालु वर्ष सहित तीन वर्षको कार्यकालमा भए गरेका कामहरूको प्रगति विवरण सार्वजनिक गर्न वडाले कार्यक्रम आयोजना गरेको थियो । वडा सचिव देवीलाल पुनको सञ्चालनमा रहेको कार्यक्रममा वडा अध्यक्ष सिर्पालीले वडाको कार्य प्रगति विवरण प्रस्तुत गरेका थिए ।

स्थानीय राजनीतिक दल, बुद्धिजीवी, शिक्षक, वडाबासी, पत्रकार, लगायतको उपस्थितिमा कार्यक्रम सम्पन्न गरिएको १२ नम्बर वडा कार्यालयले बताएको छ ।