सुर्खेत -३१, वैशाख ।
अनेमसंघ (समाजवादी) कर्णाली प्रदेश समितिको प्रथम प्रदेश सम्मेलनबाट प्रेम कुमारी बुढा अध्यक्षमा सर्वसम्मत चयन भएकी छन् । सुर्खेतको वीरेन्द्रनगरमा आज सम्पन्न प्रथम सम्मेलनबाट बुढा अध्यक्षमा चयन भएकी हुन् ।
सम्मेलनले बुढा सहित ३० सदस्यीय प्रदेश समिति चयन गरेको अनेमसंघ कर्णाली प्रदेशले बताएको छ । समितिको उपाध्यक्षमा दुर्गा देवी बिष्ट र सरिता भण्डारी, सचिव लक्ष्मीकुमारी ज्ञवाली, कोषाध्यक्ष कुञ्जुमा कुमाई र सहसचिवमा चिना वराल निर्वाचित भएका छन् ।
निर्वाचित नयाँ कार्यसमितिलाई अनेमसंघ केन्द्रीय उपाध्यक्ष तथा कर्णाली प्रदेश इन्चार्ज विजया बिष्ट मार्फत शपथ ग्रहण गराइएको छ ।
अनेमसंघको बन्दसत्रको हलबाट ७५ सदस्यीय समिति बनाउने निर्णय पारित भएको थियो । तर केही जिल्लाको प्रतिनिधि छुटेकाले बाँकी सदस्यलाई पछि मनोनित गर्ने बताइएको छ ।
श्रमजीवी महिला एकजुट होऔं, राज्यको सम्पूर्ण क्षेत्रमा ५० प्रतिशत महिलाको सहभागिता सुनिश्चित गरौं भन्ने नारा सहित प्रथम प्रदेश सम्मेलन भव्य रूपमा सम्पन्न भएको अनेमसंघ (समाजवादी) कर्णाली प्रदेशले जनाएको छ ।
