रुकुम पश्चिम -३१, वैशाख ।

मुसिकोट नगरपालिका -१० का किसान यतिबेला लसुन भित्र्याउन व्यस्त देखिन्छन् । वडामा उत्पादन राम्रो भएपछि किसान लसुन खनाइ, केलाइ र सुकाउने कार्यमा दिनरात नभनी जुटेका छन् ।

वडा अध्यक्ष वसन्त खड्काका अनुसार यो सिजनमा करिब १५ ट्रक बराबरको लसुन उत्पादन भएको छ । “करिब १ हजार ४ सय क्विन्टल अर्थात १ लाख ४० हजार किलो लसुन बजार पठाउने तयारी भइरहेको छ,” अध्यक्ष खड्काले बताए ।

वडाका अधिकांश घरधुरीले लसुन खेती गर्ने भएकाले अहिले मकै रोपाइँ सुरु हुनु अघिसम्म जग्गा खाली गर्नुपर्ने दबाब पनि रहेको किसानहरूले बताएका छन् । जेठ २/३ गतेभित्र मकै छर्नुपर्ने भएकाले उनीहरू दुई कामको चापमा छन्, एकातिर लसुन खन्ने, अर्कोतिर त्यसलाई केलाएर सुकाउने ।

लसुन भित्र्याउनका लागि पर्याप्त श्रम र औजार आवश्यक परेको हुँदा यस वडाका किसानहरूले कृषि विकास कार्यालय, रुकुम पश्चिमसँग सहजीकरण र सहयोगको अपेक्षा पनि गरेका छन् ।