रुकुम पश्चिम -११, वैशाख ।
रुकुम पश्चिमको त्रिवेणी गाउँपालिकाको वडानम्बर -३, खारानेटामा एकीकृत सेवा प्रवाहका लागि नवनिर्मित प्रशासनिक भवनको उद्घाटन गरिएको छ । स्थानीय तहको प्रशासकीय पूर्वाधार विकास कार्यक्रम अन्तर्गत संघ र स्थानीय सरकारको साझेदारीमा निर्मित भवनको आज उद्घाटन गरिएको हो ।
प्रतिनिधिसभा सदस्य तथा पूर्व अर्थमन्त्री जनार्दन शर्माले रिबन काटेर भवनको समुद्घाटन गरे । सो भवन ८ करोड २८ लाख ४२ हजार तीनसय ७२ रुपैयाँमा निर्माण गरिएको गाउँपालिकाले बताएको छ ।
साढे तीन तलाको ३३ कोठे भवन निर्माणमा संघीय सरकारको ६० र स्थानीय तहको ४० प्रतिशत लागत रहेको छ ।
औपचारिक रूपमा भवन उद्घाटन भएसँगै गाउँपालिकाको एकीकृत सेवा प्रवाहमा सहजता हुने बताईएको छ । स्थानीय सरकार निर्माण पछि गाउँपालिकाको आफ्नै प्रशासनिक भवन नहुँदा यस अघि अस्थायी ट्रस्टबाट सेवा प्रवाहको काम चलिरहेको थियो ।
