रुकुम पश्चिम -१८, चैत ।
नेपाल पत्रकार महासंघ, रुकुम पश्चिम शाखाले काठमाडौँको तीनकुनेमा भएको हिंसात्मक प्रदर्शनका क्रममा सञ्चारमाध्यम र पत्रकारहरूलाई लक्षित गरेर गरिएको आक्रमणप्रति गम्भीर ध्यानाकर्षण जनाउँदै दोषीमाथि कडा कारबाहीको माग गरेको छ ।
महासंघले सोमबार प्रमुख जिल्ला अधिकारी मार्फत नेपाल सरकारलाई ज्ञापनपत्र बुझाउँदै घटनामा संलग्न दोषीलाई कारबाही गर्न, पीडित पत्रकार तथा सञ्चारगृहलाई उचित क्षतिपूर्ति दिन र पत्रकार सुरक्षाको प्रत्याभूति गर्न माग गरेको हो ।
ज्ञापनपत्रमा उल्लेखित घटनाका अनुसार, प्रदर्शनकै क्रममा पत्रकार सुरेश रजकको ज्यान गएको, अन्नपूर्ण पोस्ट दैनिकको कार्यालयमा आगजनी, कान्तिपुर टेलिभिजन तथा हिमालयन टेलिभिजनको भवन र सवारी साधन तोडफोड, पत्रकार दिनेश गौतममाथि आक्रमण, तथा फोटो पत्रकार निराज तामाङको क्यामेरा हराएको जस्ता घटनाहरू भएका छन् ।
महासंघका उपाध्यक्ष देवकुमार ओलीद्वारा हस्ताक्षरित ज्ञापनपत्रमा सरकारले एक साताभित्रै दोषीमाथि कानुनी कारबाही नगरे देशव्यापी आन्दोलन सुरु गर्ने चेतावनी दिइएको छ। साथै महासंघले पत्रकार सुरक्षाका लागि दीर्घकालीन नीति निर्माण गर्न पनि सरकारलाई आग्रह गरेको छ ।
