रुकुम पश्चिम -१, चैत ।

नेकपा एकीकृत समाजवादीले रोजगारी र सुशासनका लागि पहिलो चरणमा गरिने आन्दोलनका कार्यक्रम सार्वजनिक गरेको छ । सुशासन र रोजगारी, समाजवादको तयारी भन्ने मूल नाराका साथ आन्दोलनका कार्यक्रम आज सार्वजनिक गरेको हो ।

समाजवादीले १० वटा विषयवस्तुलाई विशेष मुद्दाका रूपमा उठान गर्दै आन्दोलनका कार्यक्रम सार्वजनिक गरिएको बताएको छ । जसअन्तर्गत सबै नेपालीलाई रोजगारी दिने र सुशासनयुक्त नेपाल बनाउन कृषि, उद्योग, पर्यटन, पूर्वाधार, शिक्षा, स्वास्थ्य र सुशासनलाई आन्दोलनका रुपमा उठाएको छ ।

त्यस्तै विदेश नीति, संविधान कार्यान्वयनको पुनरावोकन तथा रोजगारी र सुशासनका लागि राष्ट्रिय सम्मेलन मुख्यत: आन्दोलनका प्रमुख एजेन्डा रहेका छन् ।

पहिलो चरण अन्तर्गत यी आन्दोलनका कार्यक्रम केन्द्रदेखि स्थानीय वडा तह सम्म सञ्चालन गरिने भएको छ । चैत २ गतेदेखि वैशाख २५ सम्म आन्दोलनका कार्यक्रम जारी रहनेछन् ।

जसअनुसार चैत दुई देखि ६ गते सम्म मातहत कमिटीहरुमा छलफल, चैत सात देखि १५ सम्म केन्द्रीय तहमा विभिन्न क्षेत्रका संघ-सङ्गठन तथा व्यक्तिहरुसंग सम्वाद तथा सुझाव संकलन गरिने छ । यसैगरी चैत २० गते सरकारलाई ज्ञापनपत्र बुझाउने, चैत मसान्तसम्म प्रदेश र जिल्ला तहमा सार्वजनिक सम्बाद तथा सुझाव सङ्कलन र वैशाख ५ गते प्रदेश सरकार र जिल्ला प्रशासन कार्यालयमा ज्ञापन पत्र पेश गर्ने कार्यक्रम रहेको छ ।

त्यस्तै वैशाख १५ गतेसम्म पालिका र वडा तहमा सार्वजनिक सम्बाद तथा सुझाव संकलन र वैशाख १९ देखि २२ गतेसम्म पालिका र वडा कार्यालयहरुमा ज्ञापन पत्र पेश गर्ने नेकपा एकीकृत समाजवादीले बताएको छ ।

त्यसपछि पुनः वैशाख २५ गते दोस्रो चरण अन्तर्गत आन्दोलनका कार्यक्रम सार्वजनिक गरिने जनाइएको छ ।