रुकुम पश्चिम -९, फागुन ।

रुकुम पश्चिमको सदरमुकाम मुसिकोट बजारको ट्राफिक व्यवस्थापनमा सुधार हुँदै गएको निष्कर्ष निकालिएको छ । एक महीना अघिदेखि जिल्लाको यातायात व्यवस्थापनलाई व्यवस्थित गर्ने गरी सुरु गरिएको यातायात व्यवस्थापनमा सुधार देखिएको हो ।

मुसिकोट बजारको यातायात व्यवस्थापन सम्वन्धि प्रमुख जिल्ला अधिकारी कुलबहादुर जिसीको अध्यक्षतामा आज बसेको बैठकले ट्राफिक व्यवस्थापनमा सुधार आएको निष्कर्ष निकालेको छ । प्रजिअ जिसीका अनुसार आजको बैठकबाट मुसिकोट बजारको ट्राफिक व्यवस्थापनलाई निरन्तरता दिंदै निकायगत जिम्मेवारीलाई पनि सुधार गर्ने प्रतिवद्धता जनाइएको छ ।

त्यस्तै बैठकले मठस्थित राप्ती राजमार्गको दायाँ-बायाँको सवारी पार्किङ्गलाई हटाउने निणर्य गरेको छ । त्यसका लागि यस स्थानमा रहेको यातायात काउन्टर र सवारीसाधनहरुलाई सल्ले बसपार्कमा राख्ने गरी व्यवस्था मिलाइने भएको छ ।

यसैगरी नयाँ बसपार्क सञ्चालन गर्न तत्काल पहुँच मार्गको समस्या देखिएकाले मुसिकोट नगरपालिका र शहरी विकास तथा भवन डिभिजन कार्यालयले सहकार्य गरी शीघ्र कार्यान्वयन गर्नुपर्ने आजको बैठकको निर्णय छ ।