रुकुम पश्चिम -१९, वैशाख ।
मुक्तक : १
तै रानी मै रानी छैन मेल जहाँ हलचल भो
सत्ताकै लागि मरिहत्ते गर्ने खेल जहाँ हलचल भो ।
कस्ता थिए सपनाहरू स्वर्गरुपी मेरो देश नेपालका
कुसंस्कारी व्यभिचारीलाई हाल्दा जेल जहाँ हलचल भो ।
मुक्तक : २
मेरो देशमा आज सुशासनको साथमै अन्योल छ
अभावका मान्छेहरु खान नपाएर भातमै अन्योल छ ।
छलछाम नगरी कसरी कमाए किन पत्याउनु पर्ने
सत्तामा रमाउनेहरु बिघा सुनको खातमै अन्योल छ ।
मुक्तक : ३
आज मान्छे यति लाछी भएकै छन्
माछो छोडेर मानव मार्ने माझी भएकै छन् ।
स्याल तर्साउन हिडेको भाइले बाघ ढालेछ
बाघ छुन पनि दुनियाँ गुहार्ने जेन्जी भएकै छन् ।
मुक्तक : ४
दमनले हानेको लात अमूल्य पर्ला
तिमीले गरेको घात अमूल्य पर्ला ।
समय सबैको आउँछ हेर सरकार
आउँदो चुनावको साथ अमूल्य पर्ला ।
मुक्तक : ५
पीडितको पीडामाथि खेल्न जानेका छौ
धोका दिएर आज रम्न जानेका छौ ।
छलछाम गर्ने घरबारे बैगुनी लाजपसेराहरु,
चोखो मयालाई पनि कति छल्न जानेका छौ ।
