रुकुम पश्चिम -१५, वैशाख ।
आफैँमा हिमाली जिल्ला रुकुमपूर्व
चिसो मौसम कृषकको कठिन श्रम
जति मेहनत हुन्छ, त्यति उत्पादन हुँदैन
सुन्दर वस्तीहरु छन्, कृषि फस्टाउँदो छैन ।
वसन्त ॠतुको यो मौसममा
अनाज भित्र्याउने यो समयमा
बाह्र र तेह्र बैशाखको दिनमा
यस्तो विनासकारी आयो असिना ।
गासको आश थियो कृषकको मनमा
बिजोक रुपमा नष्ट भए गहुँका बाला
निराश बनायो कृषकको पसिनाको मूल्य
पीडा भएछ नपाउँदा परिश्रमको फल तुल्य ।
पसिना बगाएर रोपेको थियो आशा
माटोमा गाडिएको थियो जीवनको भाषा
तर एकैछिनमा सेताम्मे भयो पाखा खेत
असिनाले लुट्यो किसानको मेहनत ।
भकारी रित्तिने भो, चुलो चिसो हुने भो
आँखा अगाडि नै सपना खसे जस्तै भो
यतिबेला चाहियो कृषकलाई सहारा
स्थानीय सरकारको होला अभिभारा ।
सर्वसुलभ खाद्यान्नको व्यवस्था गरियोस्
पीडित कृषकको जीवनमा फेरि हाँसो होस्
विनाशकारी असिना, श्रमको पसिना बगायो आज
कृषिमा रमाउने अझै बनोस् भोलिको समाज ।
