रुकुम पश्चिम -२५, चैत ।
नेपाल पत्रकार महासङ्घ केन्द्रीय समितिको परिपत्र अनुसार आज रुकुम पश्चिम शाखाले भर्चुअल बैठक बसी सबै पत्रकारहरू एकताबद्ध हुने निर्णय गरेको छ । शाखाका पूर्व अध्यक्ष र वर्तमान पदाधिकारीको बैठकले हालै सरकारले सरकारी संचार माध्यममा मात्र सूचना/विज्ञापन प्रसारण गर्ने निर्णयको विरोध गर्दै एकताबद्ध हुने निर्णय गरेको हो ।
नेपाल पत्रकार महासङ्घ रुकुम पश्चिम शाखाका अध्यक्ष गोपाल प्रसाद रेग्मीका अनुसार आजको बैठकले सरकारको निर्णयलाई असंवैधानिक ठहर गरेको छ । सरकारी सञ्चार माध्यम बाहेक निजी तथा अन्य सञ्चारमाध्यमलाई सूचना तथा विज्ञापनमा बन्देज गरिनु सरकारको अलोकतान्त्रिक निर्णय भएको बैठकको निष्कर्ष छ । यस्तो अवस्थामा सरकारले उक्त निर्णय फिर्ता नगरेमा चरणबद्ध रूपमा दबाबका कार्यक्रम सिर्जना गर्ने बताइएको छ ।
रुकुम पश्चिम शाखाले आयोजना गरेको बैठकमा महासङ्का पूर्व अध्यक्ष तथा संस्थापक नारायण कुमार शाह, पूर्व अध्यक्ष गणेश बिक र लक्ष्मण केसी तथा महासङ्घका पदाधिकारी भर्चुअल बैठकमा सहभागी थिए ।
नेपाल पत्रकार महासङ्घ केन्द्रको निर्णय अनुसार बिहीबार रेडियो तथा अनलाइन सम्पादक सँग थप बैठक आयोजना गरिएको अध्यक्ष रेग्मीले बताए ।
