रुकुम पश्चिम -२२, चैत ।
आदरणीय अभिभावकज्यू,
सादर नमस्कार ।
यहाँको सुस्वास्थ्य तथा परिवारको सुख-समृद्धिको कामना गर्दै, म तपाईँका छोराछोरीको गणित विषयको शिक्षकको हैसियतले केही मनका कुरा राख्न चाहन्छु । विद्यालयले दिने नियमित शिक्षणसँगै घरको वातावरण र अभिभावकको साथले विद्यार्थीको सिकाइलाई अझ प्रभावकारी बनाउँछ भन्नेमा म पूर्ण विश्वस्त छु ।
शैक्षिक सत्र २०८२ को बार्षिक परीक्षा सकिएर नतिजा पनि प्रकाशन भैसकेको छ । केही दिन, विद्यार्थी भर्ना अभियान चल्ने समयसम्मका लागि विदा गरिएको छ ।
हालको विदाको समयलाई हामी प्रायः आराम, घुमघाम वा अन्य काममा बिताउने गर्दछौँ ।
आराम आवश्यक भए पनि, यो समयलाई पूर्ण रूपमा निष्क्रिय बनाउनु चाहिँ दीर्घकालीन रूपमा लाभदायक हुँदैन । त्यसैले, म विनम्र अनुरोध गर्न चाहन्छु कि यो विदाको समयलाई सदुपयोग गर्दै आफ्ना बालबालिकालाई आधारभूत गणितीय ज्ञानको अभ्यासमा संलग्न गराइदिनुहोस् ।
गणित केवल एउटा विषय मात्र होइन, यो जीवनको अभिन्न हिस्सा हो । दैनिक जीवनका साना-ठूला कामहरू-किनमेल, समय व्यवस्थापन, दूरीको हिसाब, नापतौल, बजेट निर्माण-सबैमा गणितको प्रयोग हुन्छ । त्यसैले, बालबालिकाले गणितलाई किताबमा मात्र सीमित नराखी व्यवहारमा उतार्न सिक्नु अत्यन्त आवश्यक छ ।
तपाईँले घरमै सरल तर प्रभावकारी तरिकाले बालबालिकालाई गणित अभ्यास गराउन सक्नुहुन्छ । उदाहरणका लागि, गाउँघरमा नयाँ घर बनाउदा ज्यामितिय आकृति कुराहरु सिक्न सक्छन् । त्रिभुज, आयात, वर्ग, चतुर्भुज आदि ।
बजार जाँदा सामानको मूल्य जोड्न लगाउने,
पैसा फिर्ता कति आयो भनेर गणना गर्न लगाउने, घडी हेरेर समयको हिसाब गर्न सिकाउने, घरका सामान नापतौल (जस्तै: किलो, लिटर) मा बुझाउन प्रोत्साहन गर्ने ।
यी साना अभ्यासहरूले बालबालिकामा गणितप्रतिको रुचि बढाउनुका साथै उनीहरूको तार्किक सोच र समस्या समाधान गर्ने क्षमता पनि विकास गर्छ ।
विदाको समयमा दैनिक कम्तीमा ३० मिनेटदेखि १ घण्टासम्म गणित अध्ययन र अभ्यास गर्न लगाउनु उपयुक्त हुन्छ । यसका लागि विद्यालयबाट दिइएका अभ्यासहरू, पुराना कापीहरू, वा सरल प्रश्नहरू दोहोर्याउन सकिन्छ । नियमित अभ्यासले सिकाइलाई मजबुत बनाउँछ र भविष्यका जटिल विषयहरू बुझ्न सहज बनाउँछ ।
हामीले प्रायः सुन्ने गर्छौँ- “गणित गाह्रो छ ।” तर वास्तविकता के हो भने, गणित गाह्रो होइन, अभ्यासको कमीले गाह्रो महसुस हुन्छ । यदि बालबालिकाले निरन्तर अभ्यास गरे भने, उनीहरूले गणितलाई रमाइलो र सजिलो रूपमा लिन थाल्छन् । त्यसैले, तपाईँको सानो साथ र प्रेरणाले उनीहरूको आत्मविश्वास बढाउन ठूलो भूमिका खेल्छ ।
अन्त्यमा, म फेरि एकपटक जोड दिन चाहन्छु- “गणित जीवन हो ।” यसलाई केवल परीक्षा पास गर्ने माध्यमका रूपमा नभई, जीवनमा प्रयोग हुने सीपका रूपमा विकास गराउन हामी सबैको साझा जिम्मेवारी हो । विद्यालय र घरको सहकार्यबाट मात्रै बालबालिकाको समग्र विकास सम्भव छ ।
तपाईँको अमूल्य सहयोग र साथको अपेक्षा राख्दै, धन्यवाद ।
-डिकेन्द्र शाह
गणित शिक्षक
श्री सहिद वासु स्मृति नमुना आधारभूत विद्यालय, भूमे -३, क्याङ्सी, रुकुम पूर्व ।
मिति: २०८२ चैत २२ गते रोज शुभम ।
