रुकुम पश्चिम -१९, चैत ।
आजदेखि यस वर्षको माध्यमिक शिक्षा परीक्षा (एसइई) सुरु हुँदैछ । चैत २९ गते सम्म सञ्चालन हुने (एसइई) परीक्षामा देशैभरबाट ५ लाख १२ हजार ४ सय २१ विद्यार्थी सहभागी हुँदैछन् ।
राष्ट्रिय परीक्षा बोर्डका अनुसार आज पहिलो दिन अनिवार्य अङ्ग्रेजी विषयको परीक्षा सुरु हुँदैछ । परीक्षा बिहान ८ बजेदेखि सुरु भई ११ बजे सकिने परीक्षा बोर्डको समय तालिका रहेको छ ।
रुकुम पश्चिमबाट करिब ४ हजार विद्यार्थीले (एसइई) दिँदै
यसपटकको माध्यमिक शिक्षा परीक्षा (एसइई) मा रुकुम पश्चिमबाट करिब चार हजार विद्यार्थी सहभागी हुँदैछन् । जिल्लाका ७७ वटा सामुदायिक विद्यालय र पाँचवटा संस्थागत गरी ८२ वटा विद्यालयबाट ३ हजार ९ सय २७ विद्यार्थीले (एसइई) दिँदैछन् ।
जस अनुसार नियमित तर्फ ३ हजार ७ सय ८४ जना र ग्रेड वृद्धि तर्फ १ सय ४३ जना विद्यार्थीले एसइई परीक्षा दिनेछन् ।
एसइई परीक्षामा नियमित अन्तर्गत साधारण तर्फ ३ हजार ६ सय ८७ र प्राविधिक तर्फ ९७ जना विद्यार्थी सहभागी हुने शिक्षा विकास तथा समन्वय इकाई प्रमुख तारा प्रकाश पुन मगरले बताए ।
आजदेखि सुरु हुने (एसइई) परीक्षाका लागि १६ जना केन्द्राध्यक्ष, २६ जना सहायक केन्द्राध्यक्ष, १ सय ९६ जना निरीक्षक र चार जना प्राविधिक, ४० जना परीक्षा सहायक र दुई जना प्राविधिक, ७८ जना कार्यालय सहयोगी र दुईजना प्राविधिक तथा २ सय ४० जना सुरक्षाकर्मी परिचालन गरिएको छ ।
कुन पालिकामा कति परीक्षा केन्द्र र विद्यार्थी
आजदेखि सुरु हुने (एसइई) परीक्षाका लागि मुसिकोट नगरपालिकामा चारवटा परीक्षा केन्द्र रहेका छन् । यी चारवटा परीक्षा केन्द्रबाट ८ सय ६४ जनाले (एसइई) परीक्षा दिँदैछन् ।
आठबिसकोट नगरपालिकामा पनि चारवटा परीक्षा केन्द्र रहेका छन् । यो पलिकाबाट ८ सय ४९ जना विद्यार्थी (एसइई) परीक्षामा सहभागी हुँदैछन् ।
चौहरजहरी नगरपालिकामा दुईवटा परीक्षा केन्द्र राखिएको छ । यी दुई परीक्षा केन्द्रबाट ८ सय ५ जना विद्यार्थी (एसइई) मा सहभागी हुने शिक्षा विकास तथा समन्वय इकाइका प्राविधिक सहायक जमुना भण्डारीको भनाइ छ ।
त्यस्तै सानीभेरी गाउँपालिकामा दुईवटा परीक्षा केन्द्र रहेको र ५ सय ३४ जना विद्यार्थीले (एसइई) परीक्षा दिँदैछन् । त्रिवेणी गाउँपालिकामा पनि दुईवटा परीक्षा केन्द्र रहेको र ४ सय ४७ जना विद्यार्थीले (एसइई) परीक्षामा सहभागीता जनाउने बताइएको छ ।
बाँफिकोट गाउँपालिकाको दुईवटा परीक्षा केन्द्रबाट भने ४ सय २६ जना विद्यार्थीले (एसइई) दिँदैछन् ।
गतवर्ष चैत ७ गतेदेखि सुरु भएको (एसइई) परीक्षामा भने जिल्लाको १५ वटा परीक्षा केन्द्रबाट ३ हजार ६ सय ७० जना विद्यार्थी सहभागी भएका थिए । गत वर्षको तुलनामा यो वर्ष (एसइई) मा २ सय ५७ जना विद्यार्थी थप भएका छन् ।
यस वर्ष आठविसकोट नगरपालिकाको नेपाल राष्ट्रिय माध्यमिक विद्यालय गत्तासैनामा परीक्षा केन्द्र थप गरिएसँगै १६ वटा परीक्षा केन्द्रबाट (एसइई) परीक्षा सञ्चालन हुने जनाइएको छ ।
आजदेखि सुरु हुने (एसइई) परीक्षा चैत २९ गते सकिनेछ ।
