रुकुम पश्चिम -१७, फागुन ।
राष्ट्रिय स्वतन्त्र पार्टी रुकुम पश्चिमले आज चौरजहारी र सानीभेरीमा चुनावी कोण सभा सम्पन्न गरेको छ । फागुन २१ गते हुने निर्वाचनलाई लक्षित गर्दै जनतासँगको घरदैलो तथा भेटघाट कार्यक्रम अन्तर्गत चौरजहारी र सानीभेरीमा कोण सभा गरेको हो ।
कोण सभामा रास्वपाका प्रत्यक्ष उम्मेदवार मानबहादुर शाही र समानुपातिक उम्मेदवार प्रेम बोहरा तथा नेता पुस्तक चन्दले मन्तव्य राखे । उनीहरूले रुकुम पश्चिमको विकास र समृद्धिका लागि यसपटक नयाँ व्यक्तिलाई मतदान गर्न मतदातालाई आग्रह गरेका छन् ।
रुकुमेली जनताले खोजेको परिवर्तन र भविष्य रास्वपाले नै साकार पार्ने भन्दै आम रुकुमेलीलाई विवेक प्रयोग गर्न समेत अनुरोध गरे ।
वर्षौंदेखि एउटै व्यक्तिलाई जनप्रतिनिधिको रूपमा चयन गर्दा त्यसबाट सुशासन कायम हुन नसक्ने तर भ्रष्टाचार मौलाउने उनीहरूको भनाइ छ । यो अन्त्यका लागि रास्वपाले अघि सारेको २० वर्षको दृष्टि पत्र केन्द्रित प्रतिबद्धता अनुसार आफूहरूले नयाँ काम गर्ने बताए । त्यो नयाँ काम र परिणामका लागि आफूहरूलाई नीतिनियम तथा कानुन निर्माण गर्ने ठाउँमा जनताले नै जिताएर पठाउनुपर्ने बताएका छन् ।
चौरजहारीमा भएको चुनावी कोण सभा अघि गाजा बाजा सहित बजार परिक्रमा गरिएको थियो । त्यस्तै सानीभेरीको कोण सभामा पनि रास्वपाका स्थानीय नेता, कार्यकर्ता र उम्मेदवारको उपस्थितिमा र्याली निकालिएको हो ।
