रुकुम पश्चिम -१७, फागुन ।
प्रतिनिधि सभा सदस्य निर्वाचनका लागि यही फागुन २१ गते निर्वाचन हुँदैछ । निर्वाचन आउन अब चार दिन बाँकी छ । यतिबेला राजनीतिक दल र तिनका उम्मेदवारहरू जनताको घरदैलोमा व्यस्त छन् ।
प्रचारप्रसारका चुनावी सभा र मतदातासँग मत माग्ने समय पनि मात्रै एकदिन बाँकी छ । त्यसपछि निर्वाचन आचारसंहिता अन्तर्गत मौन अवधि सुरु हुनेछ ।
तर चुनावी अभियानमा गाउँ पसेका विभिन्न राजनीतिक दलका सभा र कार्यक्रममा दल अदलबदल गर्ने कार्यकर्ताहरूको होडबाजी चलेको छ ।
यसैबिच शनिबार मात्रै ५० भन्दा बढी कार्यकर्ताले दल अदलबदल गरेका छन् । जसअन्तर्गत बाँफिकोट -१ लागिममा नेपाली कांग्रेसले आयोजना गरेको चुनावी सभामा २९ जनाले पार्टी प्रवेश गरेका छन् । उनीहरू नेपाली कम्युनिस्ट पार्टीका स्थानीय नेता तथा कार्यकर्ताहरू भएको नेपाली कांग्रेसले बताएको छ ।
त्यस्तै आठबिसकोट नगरपालिका -१४, ज्यामिरकोटमा पनि शनिबार नेकपा एमालेका २३ जना कार्यकर्ताले नेपाली कम्युनिस्ट पार्टीमा प्रवेश गरेका छन् । उनीहरू स्थानीय कार्यकर्ता हुन् ।
यसरी चुनावको मुखैमा प्रचारप्रसारमा होमिएका राजनीतिक दलबाट चुनावी आश्वासन बाँडिँदा पार्टी अदलबदल गर्नु स्वभाविक भएको केही राजनीतिक विश्लेषक बताउँछन् ।
