रुकुम पश्चिम -१४, फागुन ।
रुकुम पश्चिमको मुसिकोट नगरपालिका -१, सल्लेमा बुद्धभूमि मानव सेवा आश्रमको भवन शिलान्यास गरिएको छ । भवन निर्माण निर्देशक समितिका सदस्य तथा समाजसेवी धनबहादुर ओली मार्फत आज भवनको शिलान्यास गरिएको हो ।
विधिवत रूपमा भवन शिलान्यास गरिएसँगै अब आश्रमको नयाँ र पक्की भवन निर्माण हुने आश्रम सञ्चालक खम्ब प्रसाद जैसीले बताए । भवन निर्माणका लागि रुकुम पूर्वको पुथा उत्तरगंगा र सिस्ने गाउँपालिका तथा जिल्लाको सानीभेरी र त्रिवेणी गाउँपालिकाको आर्थिक सहयोग रहेको छ ।
भवन निर्माणका लागि ७५ लाख रकम खर्च हुने अनुमान गरिएको छ । १२ कोठे भवन निर्माणमा स्थानीय सरकारसँगै मनकारी दाताको सहयोग र र आश्रमको लगानी रहेको छ ।
आगामी दुई महिनाभित्र उक्त भवनको निर्माण कार्य सम्पन्न गर्ने बताइएको छ । आश्रमको भवन निर्माण पछि सहाराविहीनलाई आफ्नै आश्रममा ढुक्कले व्यवस्थापन गर्न सकिने आश्रम सञ्चालक जैसीको भनाइ छ ।
हाल बुद्धभूमि मानव सेवा आश्रममा सहाराविहीन ११ जना व्यक्ति रहेका छन् । यस आश्रमले समाजसेवी तथा विभिन्न दाताको सहयोगमा आश्रममा रहेकालाई गास र बासको व्यवस्था गर्दै आइरहेको छ ।
