रुकुम पश्चिम -१२, फागुन ।
नेकपा (माओवादी) रुकुम पश्चिमले आज पार्टीको तर्फबाट प्रतिबद्धता पत्र सार्वजनिक गरेको छ । फागुन २१ गते हुने प्रतिनिधि सभा सदस्य निर्वाचनका लागि नेकपा (माओवादी) ले मुसिकोटमा पत्रकार भेटघाट गरी प्रतिबद्धता पत्र सार्वजनिक गरेको हो ।
प्रतिबद्धता पत्र सार्वजनिक गर्दै पार्टीका नेता तथा उम्मेदवार चन्द्रबहादुर बुढाले ग्रामीण अर्थतन्त्रको क्रान्तिदेखि सर्वसुलभ सूचना र सञ्चारमा संकल्प गरिएको बताए । उनले स्वाधीनता, आत्मनिर्भरता र समानताका लागि उक्त प्रतिबद्धता पत्र मार्फत १३ वटा क्षेत्रमा विशेष प्रतिज्ञा गरिएको जनाए ।
सार्वजनिक प्रतिबद्धता पत्रमा ग्रामीण अर्थतन्त्रको क्रान्तिका लागि कृषि क्षेत्रलाई आधुनिकीकरण गर्ने, पर्यटन क्षेत्रको विकास, जलविद्युत र जडीबुटीको व्यावसायिक खेती र संरक्षण गरिने संकल्प गरिएको छ ।
शिक्षा क्षेत्रलाई मर्यादित र प्राज्ञिक क्षेत्रको रुपमा घोषणा गरी परीक्षा प्रणालीलाई चुस्त गरिने र अतिरिक्त क्रियाकलापमा जोड दिने नीति लागु गर्ने बताइएको छ । त्यस्तै गाउँ गाउँमा स्वास्थ्य सेवा, एक घर एक रोजगारी, व्यवस्थित सडक पूर्वाधार र युवा तथा खेलकुद कार्यक्रमका नीति सुनिश्चित गरिने प्रतिबद्धता छ ।
पार्टीले सामाजिक र सुशासनको क्षेत्रमा पनि विभिन्न गतिविधि सञ्चालन गर्दै कला, साहित्य र संस्कृतिको विकासमा समेत जोड दिने संकल्प गरेको छ ।
त्यस्तै स्मार्ट ग्रामीण गाउँ र सहरको विकासका लागि विभिन्न अभियान सञ्चालन गर्ने र जिल्लाको सार्वजनिक यातायात व्यवस्थालाई मजबुत बनाउँदै समग्रमा सर्वसुलभ टेलिकम सेवा र इन्टरनेट प्रवाहमा प्राथमिकता दिने प्रतिज्ञा गरिएको उम्मेदवार बुढाको भनाइ छ ।
