रुकुम पश्चिम -११, फागुन ।
फागुन २१ गते हुने प्रतिनिधि सभा सदस्य निर्वाचनका लागि रुकुम पश्चिममा ८ सय ४६ जना कर्मचारी खटिने भएका छन् । जिल्लाका ७६ मतदान स्थलका एकसय ४० मतदान केन्द्र र दुई अस्थायी मतदान केन्द्रमा ८ सय ४६ जना कर्मचारी खटिने भएका हुन् ।
मुख्य निर्वाचन अधिकृतको कार्यालयका अनुसार एक मतदान केन्द्रमा मतदान अधिकृत सहित ६ जना कर्मचारी परिचालन हुनेछन् । दुई अस्थायी केन्द्रमा तीन-तीन जना कर्मचारी खटिने छन् ।
निर्वाचनलाई स्वतन्त्र, निष्पक्ष र भयरहित वातावरणमा सम्पन्न गराउन आयोगको कार्यक्रम अनुसार सबै कर्मचारीलाई निर्वाचन सम्बन्धी अभिमुखिकरण समेत दिइने भएको छ ।
यसपटकको निर्वाचनका लागि जिल्लामा मतपत्र सहित ३७ प्रकारका निर्वाचन सामग्री आइपुगेको जिल्ला निर्वाचन कार्यालयले बताएको छ ।
जिल्ला निर्वाचन कार्यालयले फागुन २१ गते हुने प्रतिनिधि सभा सदस्य निर्वाचनको तयारीका सन्दर्भमा मुसिकोटमा सोमबार एक कार्यक्रमको आयोजना गरी आयोगका गतिविधि समेत सार्वजनिक गरेको छ ।
रुकुम पश्चिममा यसपटक कुल १ लाख ६ हजार ६ सय ६ जना मतदाता रहेका छन् । फागुन २१ गते हुने निर्वाचनका लागि जिल्लामा ११ जना उम्मेदवार चुनावी प्रतिस्पर्धामा छन् ।
