रुकुम पश्चिम -४, फागुन ।
राष्ट्रिय स्वतन्त्र पार्टी रुकुम पश्चिमले निर्वाचन केन्द्रित प्रतिबद्धता पत्र सार्वजनिक गरेको छ । मुसिकोट खलङ्गामा आज पत्रकार भेटघाट आयोजना गरी ‘२० वर्षको दृष्टि पत्र’ केन्द्रित प्रतिबद्धता सार्वजनिक गरेको हो ।
पार्टी सभापति तथा प्रतिनिधि सभा सदस्यका उम्मेदवार मानबहादुर शाहीले १५ बुँदे दृष्टिपत्र सार्वजनिक गरे । दृष्टि पत्रमा स्रोत साधनमा आधारित दिगो विकासदेखि गुणस्तरीय शिक्षा र स्वास्थ सम्मका कुरालाई प्राथमिकतामा राखिएको छ ।
जुन दृष्टिपत्रमा कृषि, पर्यटन, हवाई पहुँच, करिडोर विकास, सूचना सञ्चार प्रविधिका क्षेत्रलाई विशेष प्राथमिकतामा राखिएको शाहीले बताए । त्यस्तै नदी र जलस्रोतको विकास, ग्रामीण सहरी विकास, रोजगारी र उद्यमशीलतालाई पनि प्रतिबद्धताका रूपमा समावेश गरिएको छ ।
रास्वपा उम्मेदवार शाहीले दृष्टिपत्र सार्वजनिक गर्दै रुकुम पश्चिमलाई सम्भावनाको जिल्ला बनाउन नारामा नभई योजनामा केन्द्रित भएर निर्वाचनमा होमिएको बताए । यस अभियान सहितको दृष्टिपत्रले नै जिल्लामा सुशासन र पारदर्शिता कायम हुने तथा समृद्धि र विकासमा पनि महत्त्वपूर्ण भूमिका खेल्ने उम्मेदवार शाहीको भनाइ छ ।
