रुकुम पश्चिम -१, फागुन ।
मुसिकोट नगरपालिका -६, का स्थानीयले सुवाखोलामा फोहोर फालेको भन्दै मुसिकोट नगरपालिकालाई दबाब दिएका छन् । सदरमुकाम खलङ्गा बजार क्षेत्रको फोहोर सुवा खोलामा डम्पिङ निर्माण गरेर फाल्ने निर्णयको विरोध गर्दै दबाब सिर्जना गरेका हुन् ।
फोहोर व्यवस्थापनको विषयलाई लिएर मुसिकोट -६ का जनप्रतिनिधि र नगरपालिकाबिच भएको सहमतिलाई कार्यान्वयन नगर्न अनुरोध गर्दै स्थानीयले दबाब सुरु गरेका छन् । स्थानीय युवाले नगरपालिकाले फालेको फोहोरलाई तत्काल अर्को ठाउँमा व्यवस्थापन हुनेगरी उक्त ठाउँबाट उठाएर लैजान नगरपालिकालाई अनुरोध समेत गरेका छन् । साथै फोहोर व्यवस्थापनका लागि पठाइएका सवारी साधन स्थानीयको नियन्त्रणमा रहेकाले तत्काल त्यसको विकल्प खोज्न पनि आग्रह गरेका छन् ।
सुवाखोला आसपासमा बाक्लो बस्ती भएकाले स्थानीयको स्वास्थ्यमाथि नगरपालिकाले खेलवाड गरेको र पानीका मुहान समेत प्रदूषित भएको स्थानीयको आरोप छ । यस विषयमा नगरपालिकाले तत्काल सुनुवाई नगरे यस क्षेत्रका स्थानीयबासीले आन्दोलन सिर्जना गर्ने बताएका छन् । जसबाट उत्पन्न परिस्थितिको जिम्मेवारी सम्बन्धित सरोकारवाला निकायले लिनुपर्ने स्थानीय युवा नारायण केसीको भनाइ छ । उनले स्थानीयको स्वास्थ्यमा असर गर्ने यस्ता खालका गतिविधि गर्नु पूर्व जनभावनाको कदर गर्नुपर्ने बताए ।
यसअघि मुसिकोट नगरपालिकाले मुसिकोट -१ को सल्ले नजिकै फोहोर व्यवस्थापन गर्दै आइरहेको थियो । तर त्यस आसपासका स्थानीयले फोहोरबाट उत्पन्न दुर्गन्धका कारण स्वास्थ्यमा असर परेको भन्दै फोहोर फाल्नबाट नगरपालिकालाई रोकेका थिए । जसकै कारण विगत एक महिनादेखि मुसिकोट नगरपालिकाले फोहोर व्यवस्थापन गर्न सकिरहेको छैन ।
