रुकुम पश्चिम -२८, माघ ।
नेपाली कम्युनिस्ट पार्टी कर्णाली प्रदेश सभा दलको कार्यालयले कर्णाली प्रदेश संसदीय दलका सदस्य तथा पार्टी केन्द्रीय सदस्य राज कुमार शर्मालाई निष्कासन गरेको छ । शर्माले जानी जानी दलको नीति, सिद्धान्त, उद्देश्य र आचरण विपरित कार्य गरेको भन्दै पार्टीको साधारण सदस्य समेत नरहने गरी सम्पूर्ण जिम्मेवारीबाट निष्कासन गरेको हो ।
पार्टीका प्रमुख सचेतक कृष्णबहादुर जिसीले हस्ताक्षर गरेको जानकारी पत्र अनुसार नेपाली कम्युनिष्ट पार्टीको विधान, २०८२ एवम् कर्णाली प्रदेश संसदीय दलको विधान २०८२ को प्रतिकूल हुने गरी कार्य गरेकाले शर्मालाई निष्कासन गरिएको छ । राजनीतिक दलसम्बन्धी ऐन, २०७३ को दफा ३२ को उपदफा (२) र (५) बमोजिम शर्मालाई निष्कासन गरिएकाले कर्णाली प्रदेश सभा सदस्य समेत नरहने गरी आवश्यक कारबाहीका लागि पनि अनुरोध गरिएको छ ।
शर्मालाई पार्टी केन्द्रीय समितिको माघ २६ गतेको बैठकले पार्टीको साधारण सदस्य समेत नरहने गरी सम्पूर्ण जिम्मेवारी र कर्णाली प्रदेश संसदीय दलको सदस्यबाट समेत निष्काशन गर्ने निर्णय गरेको थियो ।
पार्टी निष्कासनमा परेका शर्मा हाल प्रगतिशील लोकतान्त्रिक पार्टीमा आबद्ध रहेका छन् । उनी २०७९ मा रुकुम पश्चिम प्रदेशसभा (२) बाट प्रदेश सभा सदस्यमा निर्वाचित भएका थिए । उनी कर्णाली प्रदेश सरकारका पूर्व मुख्यमन्त्री समेत हुन् ।
