सुर्खेत -२६, माघ ।

सुर्खेतको बिरेन्द्रनगरमा आजदेखि मिथ्या सूचना सम्बन्धी विषयमा पत्रकारका लागि तालिम सुरु भएको छ । मुख्यमन्त्री तथा मन्त्री परिषद्को कार्यालय र नेपाल पत्रकार महासंघ कर्णाली प्रदेशको संयुक्त आयोजनामा पत्रकारका लागि तालिम सुरु भएको हो ।

दुई दिन सम्म चल्ने तालिममा कर्णाली प्रदेशका ६ वटा जिल्लाका ३८ जना क्रियाशील पत्रकार सहभागी भएको आयोजकले बताएको छ । तालिममा मिथ्या सूचनाको प्रकार, पहिचान र प्रतिकारलाई विषयवस्तुको रुपमा राखिएको छ । खासगरी पत्रकारहरूलाई तथ्य जाँचमार्फत सत्य सूचना प्रवाहमा सशक्त बनाउने उद्देश्यले यो तालिम आयोजना गरिएको बताइएको छ ।

उक्त तालिममा प्रशिक्षकको रुपमा उमेश श्रेष्ठ सहभागी रहेका छन् । आज बाट सुरु भएको तालिमको मुख्यमन्त्री तथा मन्त्री परिषद्को कार्यालयका सचिव विपिन आचार्यले उद्घाटन गरे ।