रुकुम पश्चिम -२४, माघ ।
मुसिकोट खलङ्गामा आज स्थानीय नीति, योजना तथा कानुन निर्माण प्रक्रियामा नागरिक समाज र संघसंस्थाको सहभागिता, संलग्नता र वकालत सम्बन्धमा अभिमुखीकरण कार्यक्रम सम्पन्न भएको छ । गैरसरकारी संस्था महासंघ कर्णाली प्रदेशको आयोजनामा एक दिने अभिमुखीकरण कार्यक्रम सम्पन्न भएको हो ।
अभिमुखीकरण कार्यक्रममा संघ संस्थाको स्थापना, निर्देशिका, स्थानीय कानून बनाउने प्रक्रिया लगायतको विषयमा गैसस महासङ्घ रुकुम पश्चिमका सचिव गोकर्ण खड्काले प्रस्तुतिकरण राखे । उनले कार्यक्रममा संस्थाको वर्गीकरण, महत्व र योगदान तथा नागरिक संघ संस्थाको महत्वको सम्बन्धमा पनि स्पष्ट पारे ।
उक्त अभिमुखीकरण कार्यक्रममा नेपालमा संघ संस्थाको वर्तमान अवस्था, चुनौती, कानुन निर्माण गर्ने निकाय र हाल देखिएका समस्याका सन्दर्भमा समेत छलफल गरिएको छ ।
जिल्ला स्थित नागरिक समाज र सरोकारवाला निकायको उपस्थितिमा सम्पन्न कार्यक्रममा गैसस महासंघले खेल्दै आएको भूमिकाका विषयमा पनि अन्तरक्रिया गरिएको थियो । कार्यक्रमको अध्यक्षता गैसस महासङ्घ रुकुम पश्चिमका अध्यक्ष भीमराज ओलीले गरेका थिए ।
