रुकुम पश्चिम -२१, माघ ।
फागुन २१ गतेको प्रतिनिधिसभा सदस्य निर्वाचनका लागि देश निर्वाचनमयी बनेको छ । यतिबेला निर्वाचनको पूर्व सन्ध्यामा क्रियाशील राजनीतिक दलका उम्मेदवारहरू जन भेटघाटमा व्यस्त बनेका छन् ।
कहिल्यै गाउँ नपस्ने नेता र दलका उम्मेदवार अहिले भने टोल टोल र घरघरसम्म पुग्न थालेका छन् । यिनै उम्मेदवारले जनताका अगाडि चुनावी एजेन्डा र विकास निर्माणका सपना बाँडिरहेका छन् ।
यसैबिच रुकुम पश्चिमको चुनावी माहोल पनि निकै रोचक ढङ्गले अगाडि बढिरहेको छ । निर्वाचनका लागि ११ राजनीतिक दलबाट उम्मेदवारी दर्ता गराएका ११ जना उम्मेदवार अहिले चुनावी प्रचारप्रसार र जन भेटघाटमा व्यस्त बनिरहेका छन् । २०६४ देखि यताको निर्वाचन मत परिणामलाई आधार मान्ने हो भने साविक माओवादीको लाल किल्ला रुकुम पश्चिममा यसपटक भने त्यो खालको वातावरण छैन ।
६४ देखि ७९ सम्म चार पटक संघीय सांसद जितेका जनार्दन शर्मा अहिले प्रगतिशील लोकतान्त्रिक पार्टीबाट उम्मेदवार बनेका छन् । यसकारण पनि यसपटकको निर्वाचनमा पूर्व माओवादीको दबदबामा ठेस लागेको सहजै अनुमान लगाउन सकिन्छ ।
माओवादी केन्द्र पार्टी लगायत १८ कम्युनिस्ट घटकहरू मिलेर बनेको नेपाली कम्युनिष्ट पार्टी निर्माणपछि रुकुम पश्चिमको पूर्व माओवादी जनमत तितरबितर हुने स्पष्ट नै छ । नेकपाबाट उम्मेदवार रहेका गोपाल शर्मा र प्रलोपा उम्मेदवार जनार्दन शर्मा दुई अलग पार्टीबाट उम्मेदवार बनिसकेपछि रुकुम पश्चिममा पूर्व माओवादीको खास विरासत गुमेको हो ।
यसकै कारण फागुन २१ को निर्वाचन निकै प्रतिस्पर्धात्मक र रोचक हुने धेरैको अनुमान छ । यही अवस्थामा निर्वाचन सम्पन्न भए कुन राजनीतिक दलका उम्मेदवारले बाजी मार्लान् अहिले नै भन्न सकिने अवस्था छैन । कतिपय राजनीतिक विश्लेषकहरूका अनुसार पूर्व माओवादी पार्टी विभक्त हुँदा यसको फाइदा नेपाली काङ्ग्रेसले लिन सक्ने अनुमान गरिएको छ । तर, काङ्ग्रेसी एकतामा पनि खास हुनुपर्ने एकता नदेखिएकाले पूर्व माओवादी, तर दुई फरक पार्टीका उम्मेदवार गोपाल र जनार्दनको नै कडा भिडन्त हुने धेरैको विश्लेषण छ ।
यो अनुमानको मुख्य कारण जिल्लामा नेपाली कम्युनिस्ट पार्टीको सांगठनिक र राजनीतिक जनआधार बलियो भएकाले नेकपाले जित्ने कतिपयको दाबी छ । अर्को तर्फ नेकपा एमालेले प्रगतिशील लोकतान्त्रिक पार्टीलाई समर्थन गरेकाले प्रलोपाले नै यसपटकको चुनाव जित्ने एक खालको आँकलन पनि गरिएको छ ।
अर्को तिर वैकल्पिक शक्तिका रूपमा उदाएको रास्वपाले समेत सम्मानजनक मत ल्याउने कतिपयको विश्लेषण छ । तर, अहिले नै उक्त दललाई प्रतिस्पर्धी दलको रुपमा धेरैले हेरेका छैनन् ।
यद्यपि रुकुम पश्चिममा चुनावी सरगर्मी बढिरहेका बेला उम्मेदवारहरूले भने चुनाव जित्ने तथ्याङ्कसहित आआफ्नो दाबी प्रस्तुत गरेका छन् । प्रचारप्रसार तथा जन भेटघाटमा आयोजना गरिने चुनावी सभा एवं सञ्चारमाध्यममा अभिव्यक्त भनाइ अनुसार सबै उम्मेदवारहरु चुनाव जित्नेमा ढुक्क बनेका छन् ।
तर यसको नतिजा रुकुम पश्चिमका जनताले फागुन २१ पछि कसलाई जिताउँछन् त्यो भने हेर्न बाँकी छ ।
फागुन २१ गते हुने प्रतिनिधि सभा सदस्य निर्वाचनका लागि रुकुम पश्चिम निर्वाचन क्षेत्र नम्बर -१ बाट नेपाली कम्युनिष्ट पार्टीबाट गोपाल शर्मा (अनल), प्रगतिशील लोकतान्त्रिक पार्टीबाट जनार्दन शर्मा, र नेपाली कांग्रेसबाट राजु केसी उम्मेदवार बनेका छन् ।
राष्ट्रिय स्वतन्त्र पार्टीबाट मानबहादुर शाही, राष्ट्रिय प्रजातन्त्र पार्टीबाट गोपाल खड्का र राष्ट्रिय जनमोर्चाबाट सत्य नारायण श्रेष्ठ उम्मेदवारको रुपमा निर्वाचनमा होमिएका छन् ।
त्यस्तै नेकपा (माओवादी) बाट चन्द्र बहादुर बुढा, उज्यालो पार्टी नेपालबाट नरेन्द्र केसी, नेकपा संयुक्तबाट शेर बहादुर केसी, आम जनता पार्टीबाट प्रेमा दमाई नेपाली र नेपाल मजदुर किसान पार्टीबाट धनबहादुर बिक चुनावी प्रतिस्पर्धामा छन् ।
नेकपा एमालेबाट उम्मेदवारी दर्ता गराएका नन्दराम देवकोटाले भने पार्टी केन्द्रको निर्देशन अनुसार प्रलोपालाई सघाउने निर्णयमा उम्मेदवारी निस्क्रिय गराएका छन् ।
रुकुम पश्चिममा यसपटक एकलाख ६ हजार ६ सय ६० मतदाताको सङ्ख्या कायम भएको छ । जसअनुसार ५४ हजार २ सय ६३ पुरुष मतदाता र ५२ हजार ३ सय ९६ जना महिला मतदाता रहेका छन् ।
त्यस्तै जिल्लामा ७६ मतदान स्थल र एकसय ४० मतदान केन्द्र कायम गरिएको छ ।
