रुकुम पश्चिम -१८, माघ ।
नेपाली कम्युनिस्ट पार्टीका उम्मेदवार गोपाल शर्मा ‘अनलले’ निर्वाचन जितेपछि मात्रै खादा र माला लगाउने बताएका छन् । प्रतिनिधि सभा सदस्यका उम्मेदवार शर्माले चुनावी प्रचारप्रसारमा जनतासँगको भेटमा निर्वाचनपछि मात्रै खादा र माला लगाउने बताएका हुन् ।
कुनै पनि उम्मेदवारले निर्वाचनको बेला घर दैलोमा जाँदा खादा माला लगाउनु फजुल खर्च र स्टन्टबाजी हुने शर्माले बताएका छन् । यस्तो तामझाम र स्टन्टबाजीले चुनाव नजितिने उनको भनाइ छ ।
नेता शर्माले प्रचारप्रसारका क्रममा मतदाता र कार्यकर्तालाई विभिन्न खाले प्रलोभन र भ्रममा नपर्न आग्रह समेत गरेका छन् ।
शर्माले रुकुम पश्चिममा पार्टीको संगठन निकै बलियो रहेकाले आगामी चुनाव जितेमा आफू ढुक्क रहेको बताउँदै आएका छन् । जिल्लाका अन्य प्रतिस्पर्धी भन्दा आफूले भारी मतान्तरले चुनाव जित्ने दाबी गर्दै फागुन २१ पछि मात्रै उनले जनताको हातबाट खादा र माला लगाउने घोषणा गरेका छन् ।
