रुकुम पश्चिम -१५, माघ ।
विजयश्वरी इङ्लिस मिडियम बोर्डिङ स्कुल मुसिकोटले विद्यार्थीका अभिभावकलाई बोलाएर सफल अभिभावकत्व कार्यक्रम सम्पन्न गरेको छ । स्कुलले आज एक औपचारिक कार्यक्रमको आयोजना गरी अभिभावकत्व कार्यक्रम सम्पन्न गरेको हो ।
विद्यालयमा अध्ययनरत बालबालिकाको आचरण र सिकाइ प्रक्रियामा असल अभिभावकले निर्वाह गर्नुपर्ने भूमिकाका विषयमा एकदिने सफल अभिभावकत्व कार्यक्रम सञ्चालन गरिएको प्रिन्सिपल जयबहादुर थापाले बताए ।
विद्यार्थीको पहिलो पाठशाला अभिभावक नै भएकाले आफ्ना बालबालिकाको रेखदेख, आनीबानी र स्वयं अभिभावकले पूरा गर्ने जिम्मेवारीका विषयमा राष्ट्रिय शैक्षिक अभियान्ता क्षेत्र प्रसाद ज्ञवाली मार्फत सफल अभिभावकत्व कार्यक्रम सम्पन्न गरिएको थापाले जानकारी दिए ।
चर्चित उत्प्रेरक तथा प्रशिक्षक समेत रहनुभएका ज्ञवालीले विद्यार्थीका अभिभावकलाई बाल बच्चाको मनोविज्ञान सँग जोडेर एक आमा बुवाले आफ्नो सन्तानको शिक्षा दिक्षा तथा कर्तव्यलाई बोध हुनेगरी महत्त्वपूर्ण प्रशिक्षण दिएका छन् ।
यसले सफल अभिभावकत्व कार्यक्रममा सहभागी भएका अभिभावकलाई आफ्ना बालबालिकाको भविष्यका बारेमा थप चिन्तन मनन गर्न सहयोग पुग्ने अपेक्षा गरिएको छ ।
प्रशिक्षक ज्ञवालीले उक्त विद्यालयमा अध्ययनरत विद्यार्थीका लागि शैक्षिक उपलब्धि, अनुशासन एवं संगीतमय पिटी तथा उत्प्रेरणा सम्बन्धी प्रशिक्षण दिएको स्कुलले बताएको छ ।
