रुकुम पश्चिम -१५, माघ ।

नेपाली कम्युनिस्ट पार्टी रुकुम पश्चिमले फागुन २१ गते हुने निर्वाचनका लागि संकल्प पत्र सार्वजनिक गरेको छ । आज बिहान मुसिकोटमा पत्रकार सम्मेलनको आयोजना गरी पाँचवटा मुख्य कुरालाई जोड दिँदै संकल्प पत्र सार्वजनिक गरेको हो ।

पार्टीले ‘शिक्षा, स्वास्थ्य, रोजगारी र पूर्वाधार : आत्मनिर्भर रुकुम पश्चिम भागको आधार’ नामक संकल्प पत्र सार्वजनिक गरेको छ । उक्त सङ्कल्प पत्रमा जिल्लाको पूर्वाधार विकासदेखि सुशासन सम्मका मुख्य कुरालाई जोड दिएको छ ।

जसअनुरूप पूर्वाधार विकास अन्तर्गत सडक तथा पुल, खानेपानी, सिँचाइ, सूचना तथा सञ्चार, जलविद्युत, सहरी विकास र विद्युतीकरणलाई पहिलो प्राथमिकतामा राखेको छ । त्यस्तै सामाजिक विकास अन्तर्गत शिक्षा, स्वास्थ्य, सामाजिक न्याय, संस्कृति संरक्षण र युवा खेलकुदतर्फ जोड दिने संकल्प गरेको छ ।

यस पार्टीले आर्थिक विकास अन्तर्गत पर्यटन, कृषि उत्पादन तथा पशुपालन र रोजगारीलाई प्राथमिकतामा राख्दै संस्थागत विकास तथा सुशासन र वन वातावरण तथा विपद व्यवस्थापनमा जोडिएर संकल्प पत्र सार्वजनिक गरिएको बताएको छ ।

यसका लागि संकल्प पत्रमा अगाडि सारिएका चुनावी प्रतिबद्धतालाई जनता माझ लिने र प्राप्त सुझावलाई ग्रहण गरी थप सुधार गरिने उक्त पार्टीको भनाइ छ ।

नेपाली कम्युनिष्ट पार्टीले सार्वजनिक गरेको संकल्प पत्रलाई अन्तिम रूप दिन भने बाँकी नै छ । पार्टी केन्द्रको घोषणा पत्र अझै प्राप्त नभएकाले संकल्प पत्रलाई थप सुधार गर्ने जनाइएको छ ।

रुकुम पश्चिमबाट नेपाली कम्युनिष्ट पार्टीले फागुन २१ गते हुने प्रतिनिधि सभा सदस्य निर्वाचनका लागि गोपाल शर्मा अनललाई उम्मेदवारको रुपमा अगाडि सारेको छ ।

त्यस्तै झक्कु प्रसाद घर्ती समानुपातिक उम्मेदवारको सूचीमा परेका छन् । यस पार्टीले मुसिकोट नगरपालिकाबाट जनतासँग भेटघाट तथा घरदैलो अभियान सञ्चालन गरेर चुनावी प्रचार प्रसारलाई तीव्रता दिएको छ ।