रुकुम पश्चिम -८, माघ ।

मुसिकोट खलङ्गाको बराह टाकुरा खेलमैदानमा आजदेखि अन्तरविद्यालय स्तरीय क्रिकेट प्रतियोगिता सुरु भएको छ । जिल्ला क्रिकेट सङ्घको आयोजना तथा देवयानी स्पोर्ट्स बागबजारको सहआयोजनामा प्रथम विद्यालय स्तरीय क्रिकेट प्रतियोगिता सुरु भएको हो ।

प्रतियोगितामा रुकुम पश्चिमका १० वटा विद्यालयले सहभागिता जनाएको आयोजक क्रिकेट सङ्घ रुकुम पश्चिमले बताएको छ । प्रतियोगिताको उद्घाटन मुसिकोट नगर प्रमुख महेन्द्र केसी मार्फत गरिएको छ । प्रमुख अतिथि समेत रहेका केसीले जिल्लाको क्रिकेट विकासलाई थप टेवा दिन प्रदेश सरकारसँग बजेट माग गरिएको बताए । बजेट उपलब्ध भएको खण्डमा नगरपालिकामा रहेका खेल मैदानलाई व्यवस्थित गरिने उनको भनाइ छ ।

विद्यालय स्तरदेखि नै क्रिकेटको विकास र खेलाडी उत्पादनका लागि जिल्ला क्रिकेट सङ्घ रुकुम पश्चिमले पहिलो पटक विद्यालय स्तरीय प्रतियोगिता सञ्चालन गरिएको बताएको छ ।

यसैगरी आजको पहिलो खेलमा सूर्योदय मावि सानीभेरीले त्रिवेणी मावि सिम्रुतुलाई आठ विकेटले पराजित गरेको छ ।