रुकुम पश्चिम -२९, पुस ।
जिल्ला प्रहरी कार्यालय रुकुम पश्चिमले चालु आर्थिक वर्षदेखि हालसम्म सम्पादित गरेका गतिविधिहरू सार्वजनिक गरेको छ । प्रहरी कार्यालयले मङ्गलबार पत्रकार सम्मेलन गरी साउनदेखि हालसम्मका सम्पादित गतिविधिहरू सार्वजनिक गरेको हो ।
प्रहरीले अपराध अनुसन्धान तथा नियन्त्रण र शान्ति सुरक्षा तथा प्रहरी कार्यतर्फका सम्पादित गतिविधिहरू सार्वजनिक गरेको छ । जसअनुसार अपराध दर्ता सम्बन्धी तथ्याङ्क, चालु मुद्दाका प्रतिवादी पक्राउ सङ्ख्या, फैसला कार्यान्वयनको तथ्याङ्क, आत्महत्या अपराध न्यूनीकरणका लागि भएका प्रयास, ठाडो उजुरी, घरेलु हिंसा लगायतका सम्पादित कार्यहरूको तथ्याङ्क सार्वजनिक गरिएको छ ।
त्यस्तै शान्ति सुरक्षा तथा प्रहरी कार्यतर्फ सवारी दुर्घटना, विपद् व्यवस्थापन र नागरिक सुनवाईका कार्यक्रम सम्पन्न गरिएको प्रहरी नायव उपरीक्षक प्रमेश बिष्टले बताए ।
प्रहरीको सम्पादित गतिविधि अन्तर्गत साउनदेखि हालसम्म अपराध दर्ता सम्बन्धी एकसय १५ वटा मुद्दा दर्ता भएका छन् । जघन्य तथा गम्भीर अपराध १५ वटा, महिला बालबालिका तथा जेष्ठ नागरिकसँग सम्बन्धित अपराध १२ वटा र आर्थिक अपराध १९ वटा रहेका छन् ।
यसैगरी जिल्लामा ६५ वटा सवारी दुर्घटना भएका छन् । जसमध्ये १७ जनाको मृत्यु हुँदा १ सय ३१ जना घाइते भएका छन् ।
प्रहरीले समुदाय तथा विद्यालय केन्द्रित सचेतनामूलक कार्यक्रम पनि सम्पन्न गरेको जनाएको छ ।
