चिना बराल
बाँके -२, पुस ।
बाँके ईसाई समाजको आयोजनामा बुधबार ख्रीष्टियन धर्मावलम्बीहरूको महान पर्व ख्रीष्टमसको अवसरमा शुभकामना आदान-प्रदान कार्यक्रम सम्पन्न भएको छ । धार्मिक सहिष्णुता, आपसी सद्भाव र सामाजिक एकताको सन्देश बोकेको उक्त कार्यक्रममा जिल्ला भरिका ईसाई धर्मावलम्बीहरूको उल्लेख्य उपस्थितिमा सम्पन्न भएको हो ।
बाँके ईसाई समाजका अध्यक्ष पास्टर शेरबहादुर बोहराको अध्यक्षता रहेको कार्यक्रममा प्रमुख अतिथि लुम्बिनी प्रदेश सरकारका सामाजिक विकास मन्त्री माननीय जन्मजय तिमल्सेना सहभागी भए । मन्त्री तिमल्सेनाले नेपालको संविधानले सबै नागरिकलाई धर्म, संस्कृति र आस्थाको स्वतन्त्रता प्रदान गरेको उल्लेख गर्दै सबै नेपालीलाई आ-आफ्नो विश्वासअनुसार धर्मकर्म गर्न पाउने अधिकार सुनिश्चित गरिएको बताए । उनले ईसाई समाजले कोहलपुर लगायत समग्र नेपाली समाजलाई एकताबद्ध बनाउन योगदान दिँदै आएको प्रशंसा गरे ।
साथै कोहलपुरमा विकासका कार्यमा सहकार्य गर्दै ईसाई धर्मावलम्बीहरूको आवश्यकता मध्यनजर गरी भवन निर्माणका लागि बजेट उपलब्ध गराउने प्रतिबद्धता व्यक्त गरे ।
कार्यक्रमका विशेष अतिथि प्रमुख जिल्ला अधिकारी दिलबहादुर तामाङले कुनै पनि परिस्थितिमा शान्ति र सुरक्षाका लागि प्रशासन सधैं संयमित र तत्पर रहने बताउँदै कार्यक्रमको सफलताका लागि शुभकामना व्यक्त गरे ।
त्यसैगरी कोहलपुर नगरपालिका प्रमुख पूर्णप्रसाद आचार्यले ख्रीष्टियन समुदाय कोहलपुर विकासको अभिन्न हिस्सा भएको उल्लेख गर्दै नगरपालिकाले उनीहरूसँग हातेमालो गर्दै अघि बढ्ने प्रतिबद्धता जनाए । उनले ख्रीष्टियन धर्मले मानिसलाई अनुशासित, सभ्य र नैतिक बनाउँदै सुन्दर समाज निर्माणमा योगदान पुर्याउने बताउँदै कोहलपुरलाई एकीकृत र समावेशी बनाउने दिशामा आगामी दिनमा सहकार्य निरन्तर रहने धारणा राखे ।
कार्यक्रममा विशिष्ट अतिथिका रूपमा नेपाल ख्रीष्टियन समाज सुदूरपश्चिमका अध्यक्ष हिरालाल भाट तथा नेपाल ईसाई समाजका अध्यक्ष पास्टर लोकबहादुर चौधरी लगायत विभिन्न संघसंस्थाका प्रतिनिधिहरूको उपस्थिति रहेको थियो । कार्यक्रम सञ्चालन बाँके ईसाई समाजका सचिव रामबहादुर पुनले गर्नुभएको थियो ।
ख्रीष्टमस शुभकामना आदान-प्रदान कार्यक्रमले धार्मिक सद्भाव, सामाजिक एकता र सहकार्यको सन्देश प्रवाह गर्दै सफलतापूर्वक सम्पन्न भएको सहभागीहरूले बताएका छन् ।
