रुकुम पश्चिम – २३, मङ्सिर ।
नेपाल प्रिमियर लिग अन्तर्गत आज भएको पहिलो क्वालिफायरमा सुदूरपश्चिम रोयल्सले विराटनगर किङ्सलाई पराजित गर्दै फाइनलमा प्रवेश गरेको छ । निकै रोचक बनेको खेलमा विराटनगरलाई ७७ रनले पराजित गर्दै सुदूरपश्चिम दोस्रो संस्करणको एनपीएलमा फाइनल प्रवेश गर्ने पहिलो टोली बनेको छ ।
जितका लागि १ सय ५६ रनको लक्ष्य पछ्याएको विराटनगर १४ ओभर एक बलमा अल आउट हुँदै ७८ रनमा सिमित भयो । विराटनगरका फाफ डु प्लेसिसले ३६ रन बनाउनु बाहेक अन्य ब्याट्सम्यानले खासै गतिलो प्रदर्शन गर्न सकेनन् । पहिलो क्वालिफायरमा सुदूरपश्चिमसँग पराजित भए सङ्गै विराटनगरले अब बुधबार एलिमिनेटरको विजेता टोलीसँग पुनः दोस्रो क्वालिफायरमा प्रतिस्पर्धा गर्ने छ । तर लिग चरणमा विराटनगरले सुदूरपश्चिमलाई पराजित गरेको थियो ।
जारी एनपीएलमा बुधबार काठमाडौँ गोर्खाज र लुम्बिनी लायन्स बिच एलिमिनेटरको खेल हुनेछ । उक्त खेलको विजेता टिमले अब विराटनगरसँग फाइनलमा पुग्न प्रतिस्पर्धा गर्नेछ । पराजित हुने टिम प्रतियोगिताबाट बाहिरिने छ ।
मङ्सिर १ गतेदेखि सुरु भएको दोस्रो संस्करणको नेपाल प्रिमियर लिग एनपीएलमा कुल ८ वटा टिमको सहभागिता रहेकोमा चारवटा टिम लिग चरणबाटै बाहिरिएका छन् ।
यसपटक टियु अन्तर्राष्ट्रिय क्रिकेट मैदानमा फ्लड लाईट र कुर्सी राखेपछि रात्रिकालीन समयमा पनि एनपीएलका खेलहरू सञ्चालन भएका छन् । एनपीएलमा एसोसिएट र टेष्ट राष्ट्रका खेलाडीहरूको समेत सहभागिता रहेको छ ।
एनपीएलको फाइनल खेल मङ्सिर २७ गते हुनेछ । पहिलो संस्करणको एनपीएल उपाधि जनकपुर बोल्ट्सले जितेको थियो । तर यसपटक जनकपुर प्रतियोगितामा एक मात्र खेल जितेर अंकतालिकाको पुछारमा रह्यो ।
