रुकुम पश्चिम -१६, मङ्सिर ।
नेपाल प्रिमियर लिग (एनपीएल) मा चितवन राइनोजलाई जनकपुर बोल्ट्सले ६ विकेटले पराजित गरेको छ । टियु क्रिकेट मैदानमा आज भएको खेलमा चितवनलाई ६ विकेटले पराजित गरेको हो ।
टस जितेर पहिला ब्याटिङ गरेको चितवनले पुरै ओभर खेलेर १ सय ७७ रनको टार्गेट दिएको थियो । जवाफी ब्याटिङमा जनकपुरले १७ ओभर ३ बलमा सो टार्गेट पुरा गर्दै पहिलो जित दर्ता गरेको छ ।
यसअघि जनकपुर चारवटै खेलमा पराजित भएको थियो । चितवन राइनोजले भने पाँचौँ खेलमा तेस्रो हार व्यहोरेको छ ।
अब आजको दोस्रो खेल ४ बजे कर्णाली याक्स र पोखरा एभेन्जर्स बिच प्रतिस्पर्धा हुनेछ ।
मङ्सिर १ गतेदेखि सुरु भएको दोस्रो संस्करणको नेपाल प्रिमियर लिग एनपीएलमा कुल ८ वटा टिमको सहभागिता रहको छ ।
यसपटक टियु क्रिकेट मैदानमा फ्लड लाईट र कुर्सी राखेपछि रात्रिकालीन समयमा पनि एनपीएलका खेलहरू सञ्चालन भइरहेका छन् । एनपीएलमा एसोसिएट र टेष्ट राष्ट्रका खेलाडीहरूको समेत सहभागिता रहेको छ ।
एनपीएलको फाइनल खेल मङ्सिर २७ गते हुनेछ । पहिलो संस्करणको एनपीएल उपाधि जनकपुर बोल्ट्सले जितेको थियो ।
