रुकुम पश्चिम -१९, कात्तिक ।
मुसिकोट नगरपालिका -५, थर्पूमा अवस्थित डिग्रेशाईकुमारीमा आज भव्य रूपमा डिग्रे मेला लाग्दैछ । हरिबोधिनी एकादशी देखि सुरु भएको पूजाआजाको आज अन्तिम दिन डिग्रे मेला लाग्दैछ ।
मन्दिर व्यवस्थापन समितिका अध्यक्ष लाल बहादुर केसीका अनुसार शाईकुमारी मन्दिरमा पूर्णिमाको दिन नाचगान, सखाल लाठी लगायत विविध प्रस्तुतिहरू मेलामा प्रस्तुत हुने गर्दछन् । मेलाको मुख्य दिन रुकुम पश्चिम, छिमेकी जिल्ला तथा देश विदेशबाट हजारौँ दर्शनार्थीको उपस्थितिले डिग्रे मेला भरिभराउ हुने गर्दछ ।
आज मेलाको अन्तिम दिन बिहानैदेखि डिग्रे मेला हेर्ने र मन्दिर दर्शन गर्ने दर्शनार्थीको घुइँचो लागेको छ ।
कर्णाली प्रदेशकै प्रसिद्ध धार्मिक स्थल डिग्रेशाईकुमारीमा आज अपराहन्नतिर सखालले लाठी नाच प्रदर्शन गरे सङ्गै विधिवत रूपमा डिग्रे मेला समापन हुनेछ ।
डिग्रे शाईकुमारी मन्दिरमा पूजापाठ गर्दा मनले चिताएको पूरा हुने धार्मिक विश्वास रहेको छ । यस डिग्रे मन्दिरमा बाह्रैमास पूजापाठ हुँदै आएपनि मूल पर्वको रुपमा (पाँच दिन) अर्थात् एकादशी देखि पूर्णिमाको दिन सम्म भव्य रुपमा पूजापाठ सहित मेला लाग्ने गर्दछ ।
डिग्रे मेलाको अवसर पारेर यहाँको मुसिकोट नगरपालिकाले समेत दुई दिन सार्वजनिक विदा दिएको छ ।
