भरत चन्द 

रुकुम पश्चिम -२६, असोज ।

रुकुम पश्चिमको मुसिकोट नगरपालिका -४, की भगवती नेपाली अहिले जीवन र मृत्युको दोबाटोमा छिन् । भगवतीको उमेर अझै सानो छ, तर उनको जीवनले बाल्यकालमा हेर्नु नपर्ने पीडा भोगिरहेको छ । भगवतीको शरीर रोगसँग लडिरहेको छ, र उनको परिवार दैनिक आर्थिक संकटसँग युद्ध लडिरहेको छ ।

आमाको गुहार

गम्भीर बिरामी भएकी भगवती नेपालीलाई हाल काठमाडौंको महाराजगञ्जस्थित शिक्षण अस्पतालमा उपचारका लागि लिनुपर्ने छ । भगवतीको परिवारका अनुसार कुनै रोग पहिचान नभएको बताईएको छ । बिरामी परेको दुई बर्षसम्म उनको सहयोगी दाताको आर्थिक सहयोग र घरपरिवारले कारेको ऋणबाट उपचार भैरहेको छ ।

चिकित्सकहरूले निरन्तर उपचार आवश्यक भएको बताएका छन् । तर, उपचारका लागि चाहिने रकम परिवारले जुटाउन नसकेको अवस्था छ । भगवतीकी आमा सुनिता नेपाली आफ्नी छोरीको जीवन जोगाउन दिनरात आँसु झार्दै सहयोगको याचना गरिरहेकी छिन् । उनले आफ्नो सानो घरदेखि खेतबारी सबै बेचेर पनि छोरीको उपचारमा लगाइसकेकी छन् । अब त परिवारसँग केही पनि बाँकी छैन । न घर, न खेत, न पैसाको स्रोत, छ त केवल छोरीको उपचार गर्न लागेको १० लाख ऋण छ ।

मादक पदार्थको लतले टुटेको परिवार

भगवतीको बुबा वर्षौंदेखि मादक पदार्थको लतमा फसेका छन् । जब परिवारलाई सबैभन्दा बढी सहारा चाहिएको थियो, त्यही बेला उनी नशाको गर्तमा हराए । घरमा दुख, भोक, पीडा र निराशा मात्रै बाँकी छ । आमा सुनिता एक्लै छोरीको उपचार र घरका बाँकी बालबालिकाको जिम्मेवारी सम्हाल्न असमर्थ भएकी छन् ।

पढाइ रोकिएका सन्तानहरू

भगवतीका एक भाई र दुई बहिनी छन् । भाइबहिनीहरू विद्यालय जान सक्दैनन् । शुल्क तिर्न नसक्दा तथा कापी कलम किताब र बिद्यालय पोसाक किन्ने पैसा नहुँदा उनीहरू पढाइबाट टाढा भएका छन् । एकातिर आमाले अस्पताल धाउदै छोरीको उपचारमा समय र आँसु खर्च गरिरहेकी छन्, अर्कोतिर घरमा भोक र अशान्ति छाएको छ ।

समुदाय र वडा सरकारको अपिल

मुसिकोट नगरपालिका -४, वडा कार्यालयले भगवतीको अवस्थाबारे औपचारिक सिफारिस गर्दै सहयोगका लागि सम्पूर्ण शुभेच्छुक, दातृ संस्था, सामाजिक संघसंस्था, सरकारी निकाय र व्यक्तिहरूलाई आ-आफ्नो ठाउँबाट सकेको सहयोग गर्न अनुरोध गरेको छ ।

वडाले लेखेको पत्रमा भनिएको छ,

“भगवती नेपालीको परिवार आर्थिक रूपमा अत्यन्तै कमजोर अवस्थामा छ । उनले छोरीको उपचारका लागि सकेसम्मको सम्पत्ति खर्च गरिसकेकी छन्। जीवनरक्षाका लागि सहयोग आवश्यक छ।”

आमाको आँसुमा लुकेको शक्ति

भगवतीकी आमा सुनिता छोरीको उपचारका लागि अस्पताल दौडिरहेकी हुन्छिन् । जुन अस्पताल गएनी छोरीको रोग पहिचान नभएपछि छोरीलाई अँगालो हालेर भक्कानिन्छन् । कहिलेकाहीँ उनले छोरीको नाडीमा हात राख्छिन् र भन्छिन्, “छोरी, तिमी निको भएर फर्कनुपर्छ । तिमी नै मेरो बाँच्ने आधार हौ ।” त्यो वाक्यले भगवतीको आमा कति बलियो र साहसी छन् भन्ने झल्काउँछ । उनले सरकार, समाज र मानवताको नाम गुहार गरिरहेकी छन्, छोरी बचाइदिनुहोस् ।

रोग संक्रमण भएदेखि श्रीमानले छोडे 

अहिले १९ बर्ष पुगेकी भगवतीले आजभन्दा दुई बर्षपहिले दाङका एक युवासँग बालविवाह गरेकी थिइन् । प्रेम विवाह गरेकी भगवतीलाई  ६ महिना नपुग्दै श्रीमानले छोडे । भगवती बिरामी हुनथालेपछि श्रीमानले छोडेको आमा सुनिता बताउँछिन् ।

तपाईंको सानो सहयोगले सुनिताको जीवन बच्न सक्छ

भगवती नेपालीको उपचारका लागि अहिले आर्थिक सहयोग अत्यावश्यक छ । भगवतीको जीवन केवल उनको परिवारको लागि होइन, मानवताका लागि पनि एक मूल्यवान जीवन हो । उनको मुटुको धड्कन रोकियो भने त्यो केवल एउटा बिरामीको मृत्यु मात्र हुने छैन, यो समाजको संवेदनशीलताको मृत्यु हुनेछ । अब पनि समय छ-हाम्रो सानो सहयोगले एउटा छोरीको जीवन फर्कन सक्छ ।