रुकुम पश्चिम -१, साउन ।
रुकुम पश्चिमको प्रसिद्ध धार्मिक स्थल डिग्रे शाईकुमारी मन्दिरमा सोलार बत्ति सहित धारा निर्माण गरिएको छ । खानेपानी, सिँचाइ तथा ऊर्जा विकास कार्यालय मार्फत् सोलार बत्ती जडान र धारा निर्माण गरिएको हो ।
कार्यालयका अनुसार आर्थिक वर्ष ८१/८२ को २० लाख बजेटबाट मन्दिर परिसरमा सातवटा सोलार बत्ती जडान तथा पाँचवटा धारा निर्माण गरिएको छ । मन्दिरमा पूजापाठ गर्न आउने दर्शनार्थीलाई लक्षित गरी स्नान सहितको खानेपानी उपलब्धताका लागि मन्दिरको दक्षिण भागमा रहेको मुहानमा व्यवस्थित धारा निर्माण गरिएको छ ।
त्यस्तै रातको समयमा मन्दिरमा हुन सक्ने चोरी तथा सुरक्षाका लागि सोलार बत्ती जडान गरिएको बताइएको छ । यसबाट रातको बेला मन्दिरमा पूजापाठ गर्न आउने भक्तजन तथा दर्शनार्थीलाई सहज हुने विश्वास गरिएको छ ।
कार्यालय प्रमुख तारा केशर वाग्ले, लेखा अधिकृत यामबहादुर केसी, मन्दिर व्यवस्थापन समिति, स्थानीय सर्वसाधारण लगायतको उपस्थितिमा डिग्रेशाई कुमारी मन्दिरमा जडान गरिएका सोलार बत्ती र धाराको उद्घाटन बिहिबार गरिएको हो ।
कर्णाली प्रदेशकै प्रसिद्ध धार्मिक स्थल डिग्रे मन्दिरमा बाह्रैमास पूजापाठ हुने गर्दछ । यहाँ हरेक वर्षको कात्तिक शुक्ल एकादशीदेखि पूर्णिमासम्म भव्य रुपमा पूजापाठ सहितको मेला लाग्ने गर्दछ ।
