रुकुम पश्चिम -१०, असार ।

नेपाल र भारतबिचको सोह्रौँ नेपाल-भारत द्विपक्षीय सुरक्षा परामर्श समूह (आइएनबिसिजिएसआई) को बैठक भारतको पुणेमा सम्पन्न भएको छ । असार ९ र १० गते नेपालको परराष्ट्र मन्त्रालय र भारतीय प्रतिनिधिमण्डलको उपस्थितिमा बैठक सम्पन्न भएको हो ।

द्विपक्षीय सुरक्षा परामर्श समूह बैठकमा नेपालको परराष्ट्र मन्त्रालय दक्षिण एसिया महाशाखाका सहसचिव गहेन्द्र राज भण्डारी र भारतीय प्रतिनिधिमण्डलको नेतृत्व भारत सरकारको विदेश मन्त्रालयका अतिरिक्त सचिव (उत्तर) मुनु महावरले गरेका थिए ।

बैठकमा दुवै देशका विदेश र रक्षा मन्त्रालयका अधिकारीहरू, साथै भारतीय सेना र नेपाली सेनाका निर्देशकस्तरका प्रतिनिधिहरू समेत सहभागी भएको बताइएको छ ।

बैठकमा दुवै पक्षबिच सुरक्षा र रक्षा सहयोगका विविध विषयहरूमा गहन र सकारात्मक छलफल, सैन्य उपकरण आपूर्ति, तालिम आदानप्रदान, संयुक्त सैन्य अभ्यास, विपद् व्यवस्थापन सहयोग तथा सैनिक आदानप्रदानका विषयमा छलफल भएको छ ।

सन् २००३ मा स्थापना गरिएको आइएनबीसीजीएसआइ द्विपक्षीय सुरक्षा र रक्षा सहयोग समन्वय गर्नका लागि भारत-नेपालबिचको मुख्य संस्थागत संयन्त्र हो । यस पटकको बैठकले सैनिक सम्बन्ध सुदृढ गर्न र रक्षा सहकार्यको नयाँ दिशा तय गर्न थप आधार तयार पारेको छ ।