रुकुम पश्चिम -१२, जेठ ।
मुसिकोट नगरपालिका वडानम्बर -१२, ले तेस्रो वर्षको कार्य प्रगति विवरण आज सार्वजनिक गरेको छ । २०७९ मा निर्वाचित भई पदभार ग्रहण पश्चात् तेस्रो वर्षको समीक्षा कार्यक्रम सहितको कार्य प्रगति विवरण सार्वजनिक गरेको हो ।
वडाध्यक्ष धिरण सिर्पालीले तेस्रो वर्षको कार्यकालमा जनतासँग गरिएको प्रतिबद्धता अनुरुप वडापालिकाको कामकाज र गतिविधिको प्रगति विवरण सार्वजनिक गरिएको बताए । जसअनुरूप वडाको विकास र समृद्धिलाई उजागर गर्ने गरी चालु वर्ष सहित तीन वर्षको कार्यकालमा भए गरेका कामहरूको प्रगति विवरणलाई समेटिएको छ ।
वडाले आर्थिक वर्ष २०८१/८२ मा यातायाततर्फ चारवटा योजनाहरू मध्य तीनवटा सम्पन्न भइसकेको र एकवटा निर्माणको क्रममा रहेको बताएको छ । खानेपानीतर्फ चारवटा योजनाहरू मध्य तीनवटा निर्माण सम्पन्न भइसकेको र एकवटा निर्माणको चरणमा रहेको छ ।सिँचाइतर्फ दुईवटा योजना सम्पन्न भइसकेको र दुईवटा निर्माणकै क्रममा रहेको बताइएको छ ।
त्यस्तै विद्यालय भवन निर्माणतर्फ तीनवटा विद्यालय भवन निर्माणको काम भइरहेको तथा एकवटा भवनको काम सम्पन्न भएको वडाले जनाएको छ ।
यसैगरी स्वास्थ्य सेवा र विविध तर्फ वडाका स्वास्थ्य शिविर, सुत्केरी आमालाई घरभेट कार्यक्रम, १५ महिनासम्मको बालबालिकालाई नियमित खोप, प्रसुति स्याहार कार्यक्रम लगायत विविध गतिविधि गरिएको वडाध्यक्ष सिर्पालीले बताए ।
यहाँको वडापालिकाले प्रशासनिक तर्फ जन्मदर्ता, मृत्युदर्ता, विवाहदर्ता लगायत ८५ वटा पञ्जीकरणका काम गरेको छ । त्यस्तै सामाजिक सुरक्षातर्फ ३ सय ४६ जना र सिफारिसतर्फ ५ सय ८७ जनालाई सेवा उपलब्ध गराइएको छ । राजस्वतर्फ दुई लाख ८६ हजार ७ सय ७४ रुपैयाँ प्रगतिको रूपमा संकलन गरिएको छ ।
तीन वर्षको अवधिमा १६ किलोमिटर सडक स्तरोन्नति
मुसिकोट नगरपालिकाको १२ नम्बर वडा कार्यालयले तीन वर्षको अवधिमा १६ किलोमिटर सडक स्तरोन्नति गरेको छ । पञ्चवर्षीय लक्ष्यअनुसार २२ किलोमिटर सडक स्तरोन्नति गर्नुपर्नेमा तीन वर्षको अवधिमा वडा भित्र १६ किलोमिटर सडक स्तरोन्नति गरिएको बताएको छ ।
वडाले तीन वर्षमा नयाँ सडक निर्माण, गोरेटो बाटो निर्माण, खानेपानी निर्माण, सिँचाई योजना निर्माण, विद्यालय भवन निर्माण, मन्दिर निर्माण लगायत २५ वटा योजनाहरूको कार्य प्रगति विवरण सार्वजनिक गरेको छ । जसमध्ये पञ्चवर्षीय लक्ष्य अनुसार तीन वर्षको अवधिमा ७० प्रतिशत लक्ष्य प्राप्त गरिएको बताइएको छ ।
यसै उपलब्धिका आधारमा पञ्च वर्षीय लक्ष्य पाँच वर्षीय कार्यकालमा शत प्रतिशत सम्पन्न गरिने वडाध्यक्ष सिर्पालीले जनाए ।
