रुकुम पश्चिम -१२, चैत ।
समाजवादी मोर्चा नेपाल, मुसिकोटको संयोजकमा नेकपा माओवादी केन्द्रका नर बहादुर खड्का चयन भएका छन् । आज मुसिकोट बागबजारमा बसेको मोर्चाको बैठकबाट खड्का संयोजकमा चयन भएका हुन् ।
बैठकले खड्कालाई संयोजक बनाउँदै ६ सदस्यीय मोर्चा गठन गरेको समाजवादी मोर्चा नेपाल रुकुम पश्चिमले जनाएको छ । मोर्चाको सदस्यमा माओवादी केन्द्रबाटै चन्द्रबहादुर केसी, नेकपाबाट तुलसा सी र राकेश सी तथा एकीकृत समाजवादीबाट बसन्त गिरी र रमेश भुषाल चयन भएका छन् ।
गतवर्ष गठन गरिएको पहिलो समाजवादी मोर्चा मुसिकोटको कार्यकाल पूरा भएको भन्दै आजको बैठकले दोस्रो कार्यकालका लागि नेतृत्व हस्तान्तरण गरेको हो । नेतृत्व हस्तान्तरण तथा बैठकमा समाजवादी मोर्चाले जिल्लामा सुशासन कायम गर्नका निम्ति खबरदारी सहितका विभिन्न कार्यक्रम गर्ने योजना बनाएको छ ।
बैठकमा नेकपा केन्द्रीय सदस्य तथा समाजवादी मोर्चाका जिल्ला संयोजक चन्द्रबहादुर सी, नेकपा एसका जिल्ला अध्यक्ष सुरज कुमार परियार, माओवादी केन्द्र मुसिकोट नगर कमिटी अध्यक्ष दलबहादुर खड्का लगायतले मोर्चाका सन्दर्भमा रहेर समसामयिक परिस्थितिका विषयमा मन्तव्य राखेका थिए ।
