रुकुम पश्चिम -१०, चैत ।
नेपालकै दश नमूना शहरमा पर्ने रुकुम पश्चिमको चौरजहारीमा निर्माणाधीन प्रदेश स्तरीय सभाहलको काममा ढिलाई भएको छ । नगरपालिकाको कार्यालय नजिकै एक वर्षअघिबाट सुरु गरिएको ट्रस सभाहलको काममा ढिलासुस्ती भएको हो ।
नयाँ सहर आयोजनाका इन्जिनियर विष्णु शाहीका अनुसार निर्माणाधीन सभाहलको हालसम्म ३५ प्रतिशत भौतिक प्रगति पूरा भएको छ । यसै आर्थिक वर्षको असार मसान्तसम्म निर्माण कार्य सम्पन्न गर्ने भनिएको सभा हलको भ्याट सहित कुल बजेट १४ करोड ८१ लाख २५ हजार ६ सय ८९ रुपैयाँ रहेको छ ।
तर अहिलेसम्म उक्त तीन तले सभाहलको कुल बजेटको साढे दुई करोड रकम मात्रै खर्च भएको छ । यस बजेटले एक वर्षको अवधिमा पहिलो तलाको काम सक्ने गरी ढलानको काम सुरु गर्न लागिएको बताइएको छ ।
साढे सातसय जना मानिस अट्न सक्ने क्षमताको सभाहलमा प्रदेश र जिल्ला स्तरका सम्मेलन तथा कार्यक्रम आयोजना गर्ने लक्ष्य राखिएको छ ।
पार्किङ सहित तीन हजार बढी वर्ग मिटर भित्र निर्माण हुँदै गरेको ट्रस सभाहल निर्माणको जिम्मा नेपाल आदर्श निर्माण कम्पनीले लिएको छ । यस कम्पनीले नयाँ सहर आयोजनासँग ८२ असारको अन्तिमसम्म निर्माणको काम सक्ने गरी २०८० पुष ९ गते सम्झौता गरेको थियो ।
नयाँ शहर आयोजनाले चौरजहारी उपत्यकामा सरकारी भवन, सडक ग्राभेल, कालोपत्रे, सौर्य बत्ति जडान, खानेपानी लगायत थुप्रै आयोजना निर्माणको काम गर्दै आएको छ । तर बजेट अभावका कारण नयाँ शहर आयोजनाका केही योजनाहरू समयमै पूरा हुन सकेका छैनन् ।
