रुकुम पश्चिम -९, चैत

रुकुम पश्चिममा तोकिएको समय सीमाभित्र निर्माण सम्पन्न गर्न नसकिएका विकास आयोजनाहरू र लागुऔषध नियन्त्रणको विषयलाई लिएर समाजवादी मोर्चा रुकुम पश्चिमले प्रमुख जिल्ला अधिकारीलाई ज्ञापनपत्र बुझाएको छ। मोर्चाका संयोजक चन्द्र सीको नेतृत्वमा बुझाइएको ज्ञापनपत्रमा चिसापानी–राडिज्युला सडक खण्ड र आठबिसकोट नगरपालिका–९ राडी बजारमा निर्माणाधीन नगर अस्पताल तोकिएको समयमा सम्पन्न नभएकोप्रति गम्भीर असन्तुष्टि व्यक्त गर्दै गरिएको छ

२०७८ सालमा ठेक्का लिइएका यी योजनाहरू पटक–पटक म्याद थप्दा समेत सुचारु नभएको र २०८२ जेष्ठ महिनासम्मको समयसीमा मात्र बाँकी रहेकाले तत्काल काम अघि बढाउन माग गरिएको छ।

निर्माण सामाग्री सडकमा जथाभावी राख्दा दुर्घटना बढेको र दुई जनाले ज्यान समेत गुमाइसकेको गम्भीर तथ्य उल्लेख छ । निर्माण स्थलमा अव्यवस्थित सामग्री राख्दा सवारी आवागमन प्रभावित भएको र सर्वसाधारणलाई सास्ती खेप्नुपरेको भन्दै सम्बन्धित ठेकेदार कम्पनी र सरकारी निकायको लापरबाहीप्रति ध्यानाकर्षण गराइएको छ।

ज्ञापनपत्रमा रुकुम पश्चिममा लागुऔषधको कारोबार, ओसारपसार र दुर्व्यसनको समस्या बढ्दै गएको र यसले युवायुवती तथा बालबालिकाको भविष्यमा गम्भीर असर पारिरहेको जनाइएको छ । समाज असुरक्षित बन्दै गएको, आत्महत्या दर बढ्दै गएको र लागुऔषध विरुद्धको अभियानलाई शसक्त बनाउनु आवश्यक रहेको उल्लेख छ।

मोर्चाले प्रमुख जिल्ला अधिकारीमार्फत निर्माण कार्य तत्काल अघि बढाउन, लागुऔषध नियन्त्रण गर्न कडा नीति अपनाउन र सुरक्षालाई प्रभावकारी बनाउन माग गरेको छ । साथै, समाजवादी मोर्चाले यस विषयमा सम्पूर्ण सहयोग र सहकार्य गर्न प्रतिबद्धता व्यक्त गरेको छ।