सुर्खेत संवाददाता -२५, फागुन ।

नेकपा (एकीकृत समाजवादी) जिल्ला कमिटी सुर्खेतले वीरेन्द्रनगरमा आइतबार नेता तथा कार्यकर्ता प्रशिक्षण कार्यक्रम सम्पन्न गरेको छ । पार्टीका जिल्ला अध्यक्ष खड्ग केसीको अध्यक्षता एवं पार्टी केन्द्रीय सचिव तथा कर्णाली प्रदेश इन्चार्ज चन्द्रबहादुर शाहीको प्रमुख आतिथ्यतामा प्रशिक्षण कार्यक्रम सम्पन्न गरेको हो ।

कार्यक्रमको उद्घाटन गर्दै प्रमुख अतिथि शाहीले पार्टीलाई बलियो बनाउन स्पष्ट दृष्टिकोण सहित नेता र कार्यकर्ता एकैसाथ अघि बढ्नुपर्ने निर्देशनात्मक धारणा राखे । उनले नेपाली कम्युनिष्ट आन्दोलनको इतिहास, नेतृत्व विकास तथा पार्टी संगठन विस्तारका विषयमा प्रशिक्षणको महत्वलाई प्रष्ट्याएका थिए ।

पार्टीका कर्णाली प्रदेश अध्यक्ष ठगेन्द्र प्रकाश पुरीको विशेष आतिथ्यता रहेको प्रशिक्षण कार्यक्रममा पार्टी उपाध्यक्ष कुमार ढकालले स्वागत मन्तव्य राखेका थिए । कार्यक्रम सञ्चालन जिल्ला सचिव कृष्णप्रसाद सुवेदीले गरेका थिए ।

त्यसैगरी, कार्यक्रममा पार्टीका केन्द्रीय सदस्य बसन्त कुमार विश्वकर्मा, केदार कंडेल तथा केन्द्रीय सल्लाहकार परिषद् सदस्य कुलदीप भट्टले प्रशिक्षणमा सहभागी कार्यकर्ताहरूलाई मार्गनिर्देशन गरेका थिए ।

प्रशिक्षणमा पार्टी निर्माण, असल नेतृत्वको गुण, पार्टी विधान, दस्तावेज र कार्यालय व्यवस्थापनका विषयमा विस्तृत छलफल गरिएको बताइएको छ । सहभागीहरूले यस्तो प्रशिक्षणले पार्टी संरचना बलियो बनाउन तथा स्थानीय स्तरसम्म प्रभावकारी संगठन विस्तार गर्न मद्दत पुग्ने विश्वास व्यक्त गरेका छन् ।