रुकुम पश्चिम -२३, फागुन ।
प्रधानमन्त्री कप पुरुष एकदिवसीय राष्ट्रिय क्रीकेट प्रतियोगिताका लागि कर्णाली प्रदेशले १५ सदस्यीय टोली घोषणा गरेको छ । कर्णाली प्रदेश क्रीकेट संघले बिहीबार छनौट क्याम्पबाट अन्तिम १५ सदस्यीय टोली घोषणा गरेको हो ।
संघले दिवान पुनको कप्तानीमा १५ सदस्यीय टोली घोषणा गरिएको बताएको छ । टोलीमा रविन्द्रजंग शाही, अर्जुन घर्ती बिटालु, प्रकाश जैसी, बिपिन विक्रम शाही, दिपेन्द्र राउत र निश्चल रावल रहेका छन् । त्यस्तै सुनिल धमला, दिनेश अधिकारी, युनिस सिंह विक्रम ठकुरी, हिमांशु शाही, विपिन रावल, अनुज कुमार चनारा, राजप्रसाद शाह र दिनेश रावत अन्तिम १५ मा अटाएका छन् ।
क्याम्पबाट चारजना खेलाडी वैकल्पिक सूचीमा परेको क्रीकेट संघले जनाएको छ । फागुन २५ गतेबाट सुरु हुने प्रधानमन्त्री कप पुरुष एकदिवसीय राष्ट्रिय प्रतियोगिताका लागि संघले क्याम्पमा ३० जना खेलाडीलाई बोलाएको थियो । जसबाट क्याम्पमा खेलाडीले गरेको प्रदर्शनका आधारमा अन्तिम टोली घोषणा गरिएको बताइएको छ ।
यसपटक देखि पुरुष एकदिवसीय राष्ट्रिय क्रीकेट प्रतियोगिता उपत्यका बाहिर आयोजना गरिएको छ । सो प्रतियोगितामा तीन विभागीय सहित सात प्रदेशको टिम सहभागी हुनेछ ।
