रुकुम पश्चिम -२१, फागुन ।
अमेरिकाले आधिकारिक कागजात नभएका आठजना नेपालीलाई आज स्वदेश फर्काएको छ । ‘चार्टर्ड ’ जहाजमार्फत उनीहरुलाई विहान दश बजे नेपाल फर्काएको हो ।
नेपाली बोकेर आएको अमेरिकी वायुसेवा कम्पनी ग्रिफोन एयरको जहाज गल्फजेटस्ट्रिम बिहान १० बजेर १५ मिनेटमा काठमाडौँ विमानस्थलमा अवतरण भएको त्रिभुवन अन्तर्राष्ट्रिय विमानस्थलका प्रवक्ता रिञ्जी शेर्पाले बताए । सो, जहाजमा चालकदल सहित १४ जना सवार रहेको जनाइएको छ ।
चार्टर्ड जहाज अमेरिकाको न्यु ह्याम्पसर राज्यको पोर्टसमाउथ अन्तर्राष्ट्रिय विमानस्थलबाट टेक्निकल ल्यान्डिङ‘ भएर सिधै काठमाडौँ अवतरण गरेको हो । जहाज अवतरणपछि अध्यागनले आवश्यक प्रक्रियाका लागि आठ नेपाली नागरिकलाई थप ‘सोधपुछ’ का लागि नेपाल प्रहरीको जिम्मा लगाएको छ ।
यसअघि अमेरिकाबाट २७ नेपाली डिपोर्ट भएर फर्किसकेका छन् ।
अमेरिकी राष्ट्रपति डोनाल्ड ट्रम्पले दोस्रो कार्यकाल सम्हालेदेखि नियमित अन्तर्राष्ट्रिय उडानबाट आधिकारिक कागजात नभएका नेपालीलाई घर पठाउन सुरु गरिएको छ ।
