रुकुम पश्चिम -१७, फागुन ।
प्रधानमन्त्री कप राष्ट्रिय क्रीकेट प्रतियोगिताका लागि कर्णाली प्रदेशको प्रारम्भिक क्याम्पमा रुकुम पश्चिमबाट सात जना खेलाडी छनौटमा परेका छन् । फागुन ११ देखि १५ गतेसम्म सुर्खेतको वीरेन्द्रनगरमा सम्पन्न भएको प्रधानमन्त्री कप कर्णाली प्रदेश स्तरीय छनौट प्रतियोगिताबाट सात जना खेलाडी क्याम्पमा परेका हुन् ।
कर्णाली प्रदेश क्रीकेट संघका सदस्य कुलप्रसाद ओलीका अनुसार क्याम्पमा राजेश रावल, रमेश कामी, अर्जुन घर्ती, कुनाल रावल र ताराप्रसाद गिरी छनौटमा परेका छन् । त्यस्तै अनुज चनारा र युनिस विक्रम सिंह पनि सो क्याम्पमा छनौट भएका छन् । कर्णालीका पाँचवटा जिल्ला सहभागी भएको छनौट प्रतियोगिताबाट संघले २८ जनाको प्रारम्भिक लिस्ट सार्वजनिक गरेको हो ।
प्रारम्भिक क्याम्पबाट अब एक दिवसीय प्रधानमन्त्री कप राष्ट्रिय प्रतियोगिताका लागि कर्णाली प्रदेशको अन्तिम टिम घोषणा गरिने बताइएको छ ।
प्रधानमन्त्री कप राष्ट्रिय क्रीकेट प्रतियोगिता फागुन २५ गतेदेखि सुरु हुने छ । सो प्रतियोगितामा तीन विभागीय र सात प्रदेशको टिम सहभागी हुनेछन् ।
