रुकुम पश्चिम -११, फागुन ।

रुकुम पश्चिम मुसिकोट नगरपालिका -५, का बिकल केसीको जीवन सानै उमेरदेखि दुःख, पीडा र संघर्षको कथाले भरिएको छ । नियतिले उनलाई बारम्बार यस्ता घाउहरू दियो, जसको कल्पना कुनै पनि साधारण मानिसले गर्न सक्दैन ।

सानै उमेरमा बुवाको मृत्यु

२०६४ साल, जब बिकल जम्मा पाँच वर्षका थिए, उनका बुवा गम्भीर बिरामी भए । दुवै मिर्गौला फेल भएपछि उपचारका लागि धेरै पैसा खर्च भयो, तर उनको जीवन बचाउन सकिएन । बिकलले सानैमा बुवाको काख गुमाए । साँझ परेपछि छिमेकीका बुबाहरू चकलेट लिएर घर फर्कंदा, उनले पनि बाटो हेर्थे, तर उनका बुबा फर्किन्थेनन् । आमाको काखमा टाउको गाडेर निस्सासिएर रुने गर्थे ।

खुट्टाको अप्रेसन पीडा

बुवाको मृत्युको केही समयपछि, जब बिकल जम्मा ६ वर्षका थिए, उनको देब्रे खुट्टामा गम्भीर चोट लाग्यो । हड्डी इन्फेक्सन भएपछि काठमाडौँको टिचिङ अस्पतालमा उपचार गर्न लगियो । घाउ यति जटिल भइसकेको थियो कि डाक्टरले खुट्टा काट्नुपर्ने सल्लाह दिए । तर आमाले आफ्नो छोराको खुट्टा काट्न मानेनन् । डाक्टरलाई निरन्तर आग्रह गर्दै उनले अप्रेसन मार्फत खुट्टा बचाउन सफल भइन् ।

मुटुको अप्रेसन र बाल्यकालको संघर्ष

बिकल आठ वर्षको हुँदा उनलाई श्वास फेर्न गाह्रो हुन थाल्यो, रिंगटा लाग्ने, शरीर निलो हुने जस्ता समस्याहरू देखिए । घरमा झारफुक गरियो, तर सुधार भएन । काठमाडौं लगेपछि डाक्टरले मुटुको एउटा भल्भ काम गर्न छोडेको र तुरुन्तै अप्रेसन गर्नुपर्ने बताए । सानो उमेरमै छाती चिरेर भल्भ फेर्नुपर्यो । उनको बाल्यकाल सामान्य बालबालिकाजस्तो भएन । अरू बालबालिकाले खेल्ने, रमाउने समयमा उनी अस्पतालका बेडहरूमा पीडासँग जुधिरहेका थिए ।

दाइको भेन्टिलेटरमा जीवनमरण संघर्ष

२०७९ सालमा बिकलका दाइ, राजन केसी गम्भीर बिरामी भए । सुरुमा सामान्य उपचार गरियो, तर सुधार भएन । उनलाई ICU मा राखियो, तर अवस्था झन् जटिल बन्दा १५ दिनसम्म भेन्टिलेटरमा राख्नुपर्यो । परिवारले जस्तोसुकै उपाय अपनाएर भए पनि उपचार गराए । ऋण लिएर भए पनि दाइलाई बचाइयो ।

दिदीको कारुणिक मृत्यु

२०८१ सालको भदौमा अर्को बज्रपात आइलाग्यो । उनकी दिदी, निर्मला केसी मोटरसाइकलमा यात्रा गर्दै गर्दा खोलाले बगाएर बेपत्ता भइन् । केही समयपछि उनको शव भेटियो। निर्मलाका दुई साना नानीहरू आमा गुमाएर टुहुरा भए । यो घटनाले बिकलको परिवारलाई झन् ठूलो मानसिक चोट दियो ।

अहिले बिकल जीवन र मृत्युको दोसाँधमा

बिकल अहिले २२ वर्षका छन् । विगतमा गरिएको मुटुको भल्भ अपरेसन फेल भएको छ । फोक्सो, कलेजो, किड्नी जस्ता अंगहरूमा अक्सिजन पुग्न छोड्दा उनको अवस्था दिनप्रतिदिन जटिल बन्दै गएको छ । उनको छाती र पेट अस्वाभाविक रूपमा सुन्निएको छ, र उनी बेला–बेला निसासिन्छन् । डाक्टरले तुरुन्तै भल्भ फेर्नुपर्ने बताएका छन् । अपरेसन गर्नलाई ७ लाख रुपैयाँ आवश्यक छ, जुन उनको परिवारसँग छैन ।

आमाको आँसु, बाजेको स्तब्धता

८२ वर्षका बाजे बिकलको अवस्थाले स्तब्ध छन् । छोराको मृत्यु, जेठो नातिको गम्भीर बिरामीपन, नातिनीको मृत्यु, र अहिले कान्छो नातिको जीवनमरणको लडाइँ देखेर उनी निरन्तर टोलाइरहन्छन् । बिकलकी आमाले छोरो छटपटाइरहेको देख्न सकिरहेकी छैनन् । उनले भनेकी छिन “बाँच्ने आशा भए अपरेसन गर्छु, पैसा जुटाउन जो जस्ले जति सक्नुहुन्छ, मदत गरिदिनुहोला ।”

सहयोगका लागि अपिल

बिकल बाँच्न चाहन्छन् । सानैदेखि उनले दुख मात्रै भोगे, तर बाँचेपछि परिवारलाई खुसी दिने उनको इच्छा छ ।

उनको जीवन रक्षाका लागि सहयोग गर्न सकिने खाता विवरण …।

नाम: Bikal K.C. खाता नम्बर: 01419750370 बैंक: Siddhartha Bank, Rukum West.

तपाईंको सानो सहयोगले बिकललाई नयाँ जीवन दिन सक्छ ।